Ukulongana Ukupya Ukwa Imikalile ya Bwina Kristu no Mulimo Tubomba

PA KUKUMANA kwa pa mwaka ukwa Watch Tower Bible and Tract Society of Pennsylvania ukwaliko pa 3 October mu 2015, ba Anthony Morris aba mwi Bumba Litungulula babilishe ukuti ukulongana ukupya ukwa Imikalile ya Bwina Kristu no Mulimo Tubomba kwali no kupyana Isukulu lya Butumikishi Ilya Bulesa, Ukulongana kwa Mulimo e lyo na Isambililo lya Baibolo Ilya pa Cilonganino. Munyinefwe Morris alondolwele no kuti Akatabo ka Kubomfya pa Kulongana kwa Imikalile ya Bwina Kristu no Mulimo Tubomba e kali no kupyana Ubutumikishi Bwesu Ubwa Bufumu. Aka katabo ka mabula 8 kalikwata amalangi kabili kafuma cila mweshi. Kalikwata imitantikile ya kulongana ukwa cila mulungu e lyo ne fikope ifilenga umuntu nga alebelenga Baibolo aumfwikisha ifyo alebelenga.

Mu kulongana ukupya mwaba imbali shitatu:

1. Icuma Icaba mu Cebo ca kwa Lesa. Ilyashi lya kubalilapo muli ulu lubali ilya mamineti 10 lifuma mu kubelenga Baibolo ukwa cila mulungu kabili kulaba no kulanda pa fikope ifiba mu katabo. Ilyashi lyalenga bubili ilitila “Ukufwayafwaya Icuma Icaba mu Cebo ca kwa Lesa”, lyakwata amamineti 8 umuba ukulanshanya na bali mwi bumba pa fyo basangile mu kubelenga Baibolo ukwa cila mulungu, lyena ilyashi lilekeleshako lya kubelenga Baibolo ilya mamineti 4.

2. Ifyo Twingacita pa Kuti Tulebila Bwino Imbila Nsuma. Muli ulu lubali, abasambi batatu balalangilila ifyo twingasambilisha umuntu pa muku wa kubalilapo, pa cipempu ca kubwelelamo, na pe sambililo lya Baibolo.

3. Ifyo Fwe Bena Kristu Tulingile Ukulaikala. Muli ulu lubali, muba ifyo twingabomfya amashiwi ya kwa Lesa ayatutungulula muli fyonse ifyo tucita. Icacindama sana muli ulu lubali kulanshanya kwa fipusho ne fyasuko pa Isambililo lya Baibolo Ilya pa Cilonganino.

Bakasabankanya isonde lyonse balalanda ifyo batasha pa fyo ukulongana ukupya kubafwa. Munyina umo ku Australia alembele ukuti: “Ukulongana kwa Imikalile no Mulimo Tubomba kusuma icine cine! Ifyo tusambilila filatwafwa sana ukulingana ne nshita tufikilepo, kabili ne filangililo filaba ifyayanguka. Ukulongana kulapwa bwangu sana, amalyashi yalaba ayepi, ifishinka filomfwika bwangu kabili filafika sana pa mutima maka maka amavidio no kulanshanya na bana.”

Ibumba lya baeluda limo ilya ku Italy lyalembele ukuti: “Ukolongana ukupya kwalilenga tulepekanya sana kabili ici calitwafwa ukuwamyako ifyo tusambilisha. Ukulongana ukupya kwaluka ukukalamba uko Yehova alebomfya ukusambilisha abantu bakwe. Kasabankanya wa myaka 15 atile: ‘Akale nshalebikako sana amano nga tulelongana. Nomba ukulongana ukupya kwalingafwa ukulabikako amano no kulapekanya bwino ukulongana konse.’”

Ulupwa lumo ulwa ku Austria lwalembele ukuti: “Kale calyafishe ukubelengela pamo Baibolo ukwa cila mulungu no mwana wesu umukashana uwa myaka 10. Nomba ulubali lwa ‘Icuma Icaba mu Cebo ca Kwa Lesa’ lwalitwafwa ukulayasukapo bwino sana. Bonse batatu nomba tulapekanya bwino ukubelenga Baibolo ukwa cila mulungu. Kabili icawamako sana ca kuti umwana wesu nomba alacita bwino mu fya kwa Lesa.”

Ba Ines abekala ku Germany balondolwele ukuti: “Ndakoseleshiwa nga ndepekanya ukulongana no kutontonkanyapo sana. Ndafwailapo sana ifyebo na fimbi nga ndepekanya ukulongana ukucila ifyo cali kale. Pali ino nshita nalitemwa sana ukuba cibusa musuma uwa kwa Yehova. Icalo ca kwa Satana cilanasha sana. Ukulongana kulangafwa ukuba na maka no kutwalilila ukubombela Lesa.”

Aba mu filonganino fya ku Solomon Islands balaipakisha sana ukulongana kabili balabombesha ukucitapo fimo pa kuti ukulongana kuwame. Ifilonganino ifingi fyabela mu ncende isha kutali ukushaba amalaiti na Intaneti kabili bamunyinefwe bekala ukushaba sana abantu. Bacitile shani pa kuti balekwata ifya kubomfya pa kutambisha amavidio no kulakwata amavidio cila mweshi? Bakasabankanya aba mu cilonganino cabela pa cishi ca Malaita bapingwilepo ukulabombela pamo ukushitisha kokonati iyauma. Balesangula indalama ku cilonganino pa kuti bashitemo ifya kubomfya pa kutambisha amavidio ukubomfya amalaiti bapanga ukufuma ku kasuba. Kabili pa kuti balekwata amavidio cila mweshi, bamunyinefwe balaya ku ncende ukwaba Intaneti pa kuti bakopolole amavidio no kupeelako bamunyina bambi mu cilonganino.

Munyina umo ku United States alembele ukuti: “Ndasambililapo bwangu nga ndemona ifyo ndesambilila, nalishupikwa sana pa myaka 40. Pa kuti ng’umfwikishe fimo no kulondolwelako umuntu umbi kano nabelengamo imiku ne miku. Kanshi ndefwaya ukutasha Ibumba Litungulula pa fya kutamba ifyo batupekanishisha. Amavidio ayalondolola ifyaba mu mabuuku ya mu Baibolo yasuma sana kabili ne fikope ifiba mu katabo ka kubomfya pa kulongana nalifitemwa sana! Fyonse ifi filanga fye ukuti Yehova alapaala ukubombesha kwenu ilyo musakamana abantu bakwe. Natasha icine cine.”