Finshi Mfwile Ukucita nga ca Kuti Natoba Amafunde Abafyashi Bampeela?

Indupwa ishingi shalikwata amafunde shikonka, pamo nga inshita ya kubwela pa ng’anda, ifya kubomfya amafoni na matabuleti, e lyo ne fya kuba no mucinshi ku bantu.

Finshi ufwile ukucita nga ca kuti watoba ifunde abafyashi bakupeela? Te kuti walule ifyo wacitile, lelo kuti wacitapo cimo pa kuti ifintu fibipa sana. Muli cino cipande twalalanda pali fimo ifyo wingacita.

• Ifyo ushifwile ukucita

• Ifyo wingacita

• Ifyo abanobe balandapo

Ifyo ushifwile ukucita

• Nga ca kuti abafyashi bobe tabeshibe ukuti walitoba ifunde, nalimo kuti watunkwa ukufisa ifishinka.

• Nga ca kuti nabeshiba ukuti nautoba ifunde, nalimo kuti watendeka ukufwaya umwa kubepekesha nelyo ukupeela bambi imilandu.

Ifi twalandapo te fyo ufwile ukucita. Mulandu nshi? Pantu ukufisa ifyacitike nelyo ukutendeka ukufwaya umwa kubepekesha kuti kwalanga fye ukuti taulakula mu mano. Na kabili ukucita ifi kuti kwalenga abafyashi bobe balakumona ukuti taulakula mu mano.

“Ukubepa te kuti kupwishe ubwafya. Mu kupita kwa nshita, abafyashi bobe bakeshiba ifyo wacitile kabili bakakusalapula sana ukucila ifyo bali no kukusalapula nga ca kuti walilandile icishinka.”—E fyalandile Diana.

Ifyo wingacita

• Ulesumina nga walufyanya. Baibo ilanda ukuti: “Uufimba pa fyabipa ifyo acitile ifintu tafyakamuwamine.” (Amapinda 28:13) Abafyashi bobe balishiba ukuti tawapwililika. Lelo bafwaya ukuti uleba ne cishinka.

  “Nga ca kuti ulelanda icishinka, abafyashi bobe bakulakubelela uluse nga walufyanya, kabili bakakucetekela sana.”—E fyalandile Olivia.

• Ulelomba ubwelelo. Baibo ilanda ukuti: “Muleicefya.” (1 Petro 5:5) Ufwile ukuicefya pa kuti ulelomba ubwelelo ukwabula ukulafwaya umwa kubepekesha.

  “Abantu abafwaya umwa kubepekesha lyonse ilyo balufyanya balaleka ukumfwa sana ububi pa fyabipa ifyo bacita. Mu kupita kwa nshita, balaleka fye no kumfwa ububi.”—E fyalandile Heather.

• Ulesumina ukukusalapula nga walufyanya. Baibo ilanda ukuti: “Muleumfwa nga bamusalapula.” (Amapinda 8:33) Wilailishanya nga ca kuti bakusalapula, kabili ulesumina ilyo bakusalapula.

  “Nga ca kuti uleilishanya sana pa fyo bakusalapwile, ukalenga ifintu ukubipilako. Ulekonka amafunde ayo bakupeele, kabili wilabika sana amano ku fyo bakusuminishe ukucita kale.”—E fyalandile Jason

• Ulebombesha pa kuti bakakucetekele na kabili. Baibo ilanda ukuti: “Mufuule ubuntu bwa kale ubwalingana ne mibele yenu iya kale.” (Abena Efese 4:22) Ulesala bwino ifya kucita pa kuti abafyashi bobe bakakucetekele na kabili.

  “Nga ca kuti watwalilila ukusala bwino ifya kucita kabili ulelanga abafyashi bobe ukuti tawakabwekeshepo ukucita ifyo wacitile, ukucita ifi kuti kwalenga abafyashi bobe bakucetekela na kabili.”—E fyalandile Karen.

Ifyo ufwile ukucita: Wilapelela fye pa kucita ifyo bakwebele, lelo ulecita na fimbi ifingalenga bakucetekela na kabili. Ku ca kumwenako, nga ca kuti tauli pa ng’anda, ufwile ukwishibisha abafyashi bobe inshita walabwela nangu ca kuti tawacelwe ukubwela. Ukucita ifi kukalenga abafyashi bobe bakeshibe ukuti ulefwaya bakucetekele na kabili.