ABACAICE BEPUSHA UKUTI
Kuti nacita shani pa kuti ndebombela pa fintu bwangu?
Bushe ulomfwa ububi pa mulandu wa kuti taupwisha bwangu imilimo nelyo ifya ku sukulu ifyo ufwile ukubombela ku ng’anda? Taulingile ukulawayawaya ukubombela pa fintu! Ici icipande calakwafwa ukulabombela bwangu pa fintu nangu ca kuti
Pa numa ya kubelenga cino icipande, tontonkanya pali aya amepusho.
Baibolo ilanda ukuti mu kukanabombela pa fintu bwangu tamufuma ifisuma. Itila: “Uulolekesha imikuukile ya mwela takatande; no umona imyendele ya makumbi takaseepe.”—Lukala Milandu 11:4.
Natulande pali fimo ifingalenga umuntu ukukanabombela pa fintu bwangu.
Umulimo ulemoneka ukwafya.
Ukulande fye icishinka, imilimo imo ilamoneka iya-afya sana ica kutila kuti wafilwa no kuibomba. Ifi kuti fyakwafwa.
Yakanya imilimo. Melissa atile: “Nangu ca kuti nimona ukuti nincelwa ukubombela pa milimo, ndesha ukubombesha pa kubomba icintu cimo pa nshita imo.”
Tendeka bwangu. Vera atile: “Uletampa ukubombela pa milimo ilyo line fye bakupeela. Ilembe pa fyo ulingile ukucita nelyo ukulemba fimo pa fyo wingaubomba ilyo ushilalaba.”
Ebako abengakwafwa. Abafyashi bobe nelyo bakafundisha nalimo balikwetepo ubo bwafya. Kuti wabepusha pa kuti bakwebako ifyo bacitile? Kuti bakwafwa ukwishiba ifya kutantika bwino ifintu ne fyo wingacita.
Ifyo wingacita Abbey atile: “Uletantikila kabela imilimo ya kubomba. Kwena ici cilepilibula ukuti ulingile ukubombesha pa kuti ubombele pa fintu ukulingana ne fyo utantike. Ukucita ifi kulafwa ukubombela pa fintu ukwabula ukucelwa.”
Taulefwaya fye ukubomba imilimo.
Ilingi imilimo batupeela ukubomba ni ilya tushatemwa sana. Nomba kuti wacita shani nga ca kuti bakupeela umilimo uo tawatemwa sana? Esha ukucita ifyakonkapo.
Uletontonkanya pa busuma bwaba mu kubombela pa fintu bwangu. Tontonkanya pa fyo ciwama nga wapwisha ukubomba imilimo imo. Amy umukashana atile: “Ndatemwa sana nga napwisha imilimo pa nshita ndefwailapo ukuipwisha, nelyo nga napwisha bwangu. Cilenga nakwata ne nshita ya kutusha.”
Uleibukisha ifingafumamo nga ca kuti taupwile ukubombela pa fintu. Nga taubombele pa fintu bwangu, kuti wacula sana pa kuti upwishe nga ca kutila kwashala fye inshita iinono, kabili te kuti ubombe na bwino. Baibolo itila: “Ico umuntu alebyala, e co akalobolola.”—Abena Galatia 6:7.
Ulepwisha bwangu imilimo ilyo no bushiku ulingile ukupwilapo tabulafika. Alicia atile: “Cilangafwa sana nga napanga ukupwisha imilimo bwangu ilyo kwashala ubushiku bumo nelyo shibili ilyo ubushiku ningile ukupwilapo tabulafika. Cilenga nakwata inshita ya kupituluka mu fyo mombele, kabili ndakwata no bushiku nelyo inshiku shibili isha kutuusha.”
Ifyo wingacita Alexis atile: “Cibafye ku fyo uletontonkanya. Ufwile ukupanga ukuti ukabombela pali fyonse ifilekabilwa nangu cikabe shani. Nga napanga ukucita ifi, cilangafwa ukupwisha imilimo palya pene fye napangile ukupwishisha.”
Walikwata ifya kucita ifingi.
Nathan atile: “Abantu batila ndawayawaya ukubombela pa fintu, nomba nshiwayawaya fye iyo! Tabaishiba fye ukuti nalikwata ifingi ifya kucita!” Nga walikwata ifya kucita ifingi nga Nathan, kuti waeshako ukucita ifi.
Balilapo ukubombela pa fyangwike. Amber umukashana atile: “Umuntu umo anjebele ati nga kuti wabombela pa mulimo umo mu mamineti fye 5 nelyo ukucepako, ulingile uku-ubombelapo apo pene fye. Pa milimo ya musango yu paba no kuwamya, ukukanika ifya kufwala, ukusamfya imbale no kutuma foni.”
Ishiba imilimo iicindamishe. Baibolo itila: “Mwishibe bwino bwino ifyacilapo ukucindama.” (Abena Filipi 1:10) Kuti mwabomfya shani aya mashiwi? Anna, umukashana atile: “Ndalemba imilimo yonse iyo nkwete, no bushiku mfwile ukupwishishapo. Lelo icacindama ca kutila ndalemba ubushiku ilyo ningile ukutendeka ukubombela pa mulimo umo na umo no bushiku ningile ukupwishishapo.”
Bushe ifi filemoka ukwafya ukukonka? Bala tontonkanyapo na kabili! Nga ca kuti nautantikila kabela imilimo, ukalapwisha ilyo kucili inshita, nomba nga tautantikiile kabela, ukulabutauka pa kucita ifintu. Ukutantikila kabela kukalenga wilanaka sana. Kelly atile: “Ndateka umutima nga ninembela kabela imilimo ningile ukubombelapo kabili cilenga nacetekela ukuti nkaipwisha.”
Wileka fimo ukukupumfyanya. Jennifer atile: “Ndeba bonse aba pa ng’anda ubushiku nkatendeka ukubombela pa milimo. Nga kuli imilimo iyo balefwaya ukuti mombe, ndabeba ukuti bampeelele limo ilyo nshilatendeka ukubombela pa milimo nkwete. Ndashimya foni no kubika kompyuta apa kuti nga e-mail yaisa nshiyumfwile.”
Ifyo wingacita Jordan atile: “Ufwile ukubombela pa milimo ukwete pantu nga taubombelepo niwe yakulapembela. Kanshi ufwile ukubombelapo fye. Nga wapwisha kuti washala ne nshita ya kutushako.”.