Cinshi Inte sha kwa Yehova Bashisefesha Krisimasi?

Ifyo Abengi Batontonkanya

Ubufi: Ico Inte sha kwa Yehova bashisefesha Krisimasi ni co tabasumina muli Yesu.

Icishinka: Tuli Bena Kristu. Twalisumina ukuti ipusukilo likabako fye muli Yesu Kristu.—Imilimo 4:12.

Ubufi: Mulaleta amalekano mu ndupwa pantu musambilisha ukuti abantu tabafwile ukulasefya Krisimasi.

Icishinka: Twalibika sana amano ku ndupwa, kabili tubomfya Baibolo ku kwafwa abantu ukukosha indupwa shabo.

Ubufi: Imwe tamucitako ifyo abantu bambi bacita mu nshita ya Krisimasi pamo nga ukupeelana ifya bupe, ukuba pa mutende na bambi, no kutemwana.

Icishinka: Lyonse fye tulesha ukuba bakapekape kabili aba mutende. (Amapinda 11:25; Abena Roma 12:18) Ku ca kumwenako, ilyo tulongana ne lyo tushimikila, tukonka amashiwi Yesu alandile, aya kuti: “Mwapeelwe fye ubupe, na imwe mulepeela fye.” (Mateo 10:8) Na kabili, twacetekela ukuti Ubufumu bwa kwa Lesa fye e bukaleta umutende pano calo.—Mateo 10:7.

Cinshi Inte sha kwa Yehova bashisefesha Krisimasi?

• Yesu tatwebele ukulasefya ukufyalwa kwakwe, lelo atwebele ukulasefya imfwa yakwe.—Luka 22:19, 20.

• Abatumwa ba kwa Yesu na Bena Kristu aba kubalilapo tabalesefya Krisimasi. Icitabo ca New Catholic Encyclopedia citila “abantu batendeke ukusefya Krisimasi pa numa ya mwaka wa 243 C.E,” ninshi palipita ne myaka ukucila pali 100 ukutula apo umutumwa wa kulekelesha afwilile.

• Takwaba ubushininkisho ubulanga ukuti Yesu afyelwe pa 25 December; Baibolo tayalanda ubushiku afyelwe.

• Twasumina ukuti Lesa tafwaya Abena Kristu balesefya Krisimasi pantu ifyo bakonka pa Krisimasi fyafuma mu mipepele ya bufi.—2 Korinti 6:17.

Mulandu nshi wingafwaila abantu ukukupata pa mulandu fye wa kukanasefya Krisimasi?

Abengi balitwalilila ukusefya Krisimasi nangu ca kuti balishiba ukuti yafuma ku mipepele ya bufi kabili Baibolo tayalandapo ukuti tulesefya. Aba bantu batontonkanya ukuti: Mulandu nshi Abena Kristu bengafwaila abantu ukubapata pa mulandu fye wa kukanalasefya Krisimasi?

Baibolo yatila tufwile ukulatontonkanya, ukulabomfya ‘amaka yesu aya kupelulula.’ (Abena Roma 12:1, 2) Itusambilisha ukuti tufwile ukutemwa sana icine. (Yohane 4:23, 24) Ca cine ukuti twalibika amano ku fyo abantu batumona, lelo ico twabikako sana amano ku kukonka amafunde yaba mu Baibolo, nangu ca kuti bamo kuti batupata.

Nangu ca kuti ifwe tatusefya Krisimasi, twalicindika abasefya. Tatubapatikisha ukuleka ukusefya.