Bushe Mwe Nte sha kwa Yehova Mulasumina Ukumundapa ku Cipatala?

Ee, Inte sha kwa Yehova balasumina umuti kabili balasumina no kubondapa. Nangu ca kuti tulasunga bwino imibili yesu kabili tulafwaya ukuba no bumi ubusuma, limo tulalwala kabili tulakabila ‘uwa kutundapa.’ (Luka 5:31) Na kuba, ba Nte bamo ni badokota nga filya fyali Umwina Kristu Luka, uwaliko mu nshita sha batumwa.​—Abena Kolose 4:14.

Inshila shimo ishakundapilamo shilapusana na mafunde ya mu Baibolo, kabili tatusumina ukundapwa kwa musango yu. Ku ca kumwenako, tatusumina ukutubikamo umulopa pantu Baibolo yalikaanya ukubomfya umulopa pa kuti tupusushe ubumi. (Imilimo 15:20) Na kabili, Baibolo yalikaanya inshila shakundapilamo umwabimbwa ifya mipashi.​—Abena Galatia 5:​19-21.

Lelo inshila ishingi ishakundapilamo tashipusana na mafunde ya mu Baibolo. Kanshi cila muntu alingile ukuisalila ifyo alefwaya. Nte umo nalimo kuti asumina ukumundapa ukubomfya inshila imo, e lyo umbi nalimo kuti akaana ukumundapa ukubomfya nshila imo ine.​—Abena Galatia 6:5.