Bushe Inte sha kwa Yehova Balikwata Amafunde Ayalanda pa Kwishishanya?

Nte sha kwa Yehova basumina ukuti amashiwi ya kwa Lesa na mafunde yakwe ayaba mu Baibolo kuti yatwafwa ukupingulapo ukulacita ifingasekesha Lesa kabili ifingatuwamina. (Esaya 48:17, 18) Te ifwe twapanga aya mafunde, lelo tulayakonka. Moneni ifyo yalandapo ifyakuma ilyashi lya kwishishanya.a

• Icupo tacilingile ukupwa. (Mateo 19:6) Apo ukwishishanya e kulenga abantu baupana, Inte sha kwa Yehova bamona ukuti ukwishishanya kwalicindama.

• Abafwile ukwishishanya bantu abakalamba abalefwaya ukuupana. Aba bantu abacila “pa mushinku wa bwaice,” nelyo abacila imyaka ilya umuntu aba sana ne nsuuna.—1 Abena Korinti 7:36.

• Abaleishishanya bafwile ukuba abashimbe. Abantu bamo abalekana ukulingana ne funde, Lesa tabamona ukuti bantungwa ukuupa nelyo ukuupwa na kabili, pantu amafunde yakwe yatila icupo kuti capwa fye lintu umo acita ubulalelale.—Mateo 19:9.

• Abena Kristu abalefwaya ukuupa nelyo ukuupwa balingile fye ukuupana no muntu uo bapepa nankwe. (1 Abena Korinti 7:39) Inte sha kwa Yehova bamona ukuti ili funde talilanda pa muntu uwa kuti alicindika imipepele yesu lelo muntu uucita ifyo ba Nte basuminamo kabili alingile ukubatishiwa no kuba Inte ya kwa Yehova. (2 Abena Korinti 6:14) Ukutula na kale Lesa eba bakapepa bakwe ukulaupana fye na bo baba nabo mu cilonganino ca mapepo cimo cine. (Ukutendeka 24:3; Malaki 2:11) Abafwailisha pa fintu batila, ili funde lilabomba na pali ino ine nshita.b

• Abana balingile ukumfwila abafyashi babo. (Amapinda 1:8; Abena Kolose 3:20) Ku bana abekala pa bafyashi babo, ili funde lilesanshamo ukumfwila ifyo abafyashi balanda pa kwishishanya. Pamo nga umushinku uo abafyashi bengasuminishishapo umwana wabo umulumendo nelyo umukashana ukutendeka ukwishishanya e lyo ne fintu fimbi ifyo bengamusuminisha ukucita.

• Ukukonka aya mafunde yaba mu Baibolo, ba Nte abene balasalapo ilyo bengatendeka ukwishishanya e lyo no wa kwishishanya nankwe. Ifi e fyo amashiwi ya kwa Lesa ayatutungulula yalanda, yatila: “Cila muntu ali no kuisendela icipe cakwe umwine.” (Abena Galatia 6:5) Na lyo line, abalefwaya ukutendeka ukwishishanya balepushako ba Nte abakalamba mu fya kwa Lesa abengabapandako amano.—Amapinda 1:5.

• Ifingi ifyo abantu abeshishanya bacita fyaba lubembu. Ica kumwenako fye, Baibolo ilatulesha ukucita ubulalelale. Ici cilesanshamo ubupulumushi, ukwikataulana ifya mfwalo, ukufyompana ifya mfwalo nelyo ukulaalana kwa kumatako. (1 Abena Korinti 6:9-11) Na kabili abashaupana tabalingile ukulacita ifintu ifingababimbula insuuna pantu uku “kukowela” kabili tafisekesha Lesa. (Abena Galatia 5:19-21) Baibolo yalikaanya ne milandile yabipa umuba “ilyashi lya nsoni.”—Abena Kolose 3:8.

• Umutima wa bucenjeshi. (Yeremia 17:9) Kuti walenga umuntu alacita ifintu ifyo aishiba ukuti fyalibipa. Pa kuti imitima yabo taibalufishe, abaleishishanya tabalingile ukulaba fye babili ukushili abantu pantu kuti balufyanya. Pa kuicingilila, nalimo kuti basalapo ukulaba pamo na bantu ababa ne mibele iisuma nelyo ukusala umuntu uwa kulaba nabo. (Amapinda 28:26) Abena Kristu abashimbe abalefwaya ukuupa nelyo ukuupwa balishiba ukuti calibipa ukulaishishanya no muntu pa intaneti, maka maka umuntu uo bashaishibana nankwe.—Amalumbo 26:4.