Amalumbo 46:10—“Talaleni, no Kwishibo Kuti ine ndi Lesa”

“Cimbeni kabili ishibeni ukuti nine Lesa. Nkacindamikwa mu nko, Nkacindamikwa pe sonde.”—Amalumbo 46:10, Amalembo ya Calo Cipya.

“Talaleni, no kwishibo kuti ine ndi Lesa; nasansabala mu nko, nasansabala pano isonde.”—Amalumbo 46:10, United Bible Societies.

Umwalola Amashiwi Yaba pa Amalumbo 46:10

Lesa afwaya ukuti abantu bonse balemupepa e lyo no kwishiba ukuti e walinga ukuteka isonde. Abantu bonse abafwaya ukwikala umuyayaya bafwile ukusumina ukuti alikwata sana amaka kabili e walinga ukuteka.—Ukusokolola 4:11.

“Cimbeni kabili ishibeni ukuti nine Lesa.” Mu ma Baibo yamo bapilibula amashiwi yakubalilapo pali ili lembo ukuti “talaleni.” Ici calenga abantu bamo ukulatontonkanya ukuti lifunde ukuba no mucinshi nelyo ukuba tondolo ilyo balepepa mu ceici. Na lyo line, amashiwi ya ciHebere ayo bapilibula ukuti “cimbeni kabili ishibeni ukuti nine Lesa” yalosha ku fyo Yehovaa Lesa aebele abantu bakwe, abakonkomeshe ukukanaba ku lubali lwa bantu bambi lelo balingile ukwishiba ukuti eka fye eo balingile ukulapepa.

Amashiwi ayapalana na yo Yehova alandile yalasangwa na mu Amalumbo 2. Muli ili Ilumbo, Lesa akacitapo cimo pa bantu abashaba ku lubali lwa kwe. Lelo bonse abaishiba amaka Lesa akwata, bashintilila pali ena pa kuti alebatungulula, ukubapeela amaka e lyo na mano. “Bonse abooba muli Ena,” balaba ne nsansa kabili balomfwa ukuti nabacingililwa maka maka mu nshita sha mafya.—Amalumbo 2:9-12.

“Nkacindamikwa mu nko, nkacindamikwa pe sonde.” Ku nshita sha ku numa, Yehova Lesa alilumbanishiwe ilyo abomfeshe amaka yakwe ku kucingilila abantu bakwe. (Ukufuma 15:1-3) Ku ntanshi, akacindikwa ukucila napo ilyo abantu bonse bakalamumfwila no kulamupepa.—Amalumbo 86:9, 10; Esaya 2:11

Amashiwi Yambi Ayaba pa Fikomo Fimbi pa Amalumbo 46:10

Ulupapulo lumo lwita Ilumbo 46 ukuti “ulwimbo ululumbanya amaka ya kwa Lesa, uwaba na maka ya kucingilila abantu bakwe.” Ilyo abantu ba kwa Lesa baleimba ulwimbo ulwaba mwi Ilumbo 46, balilangile ukuti balicetekele amaka ya kwa Yehova aya kubacingilila no kubaafwa. (Amalumbo 46:1, 2) Amashiwi yabamo yalebebukishako ukuti lyonse Yehova aleba nabo.—Amalumbo 46:7, 11.

Pa kuti bacetekele sana ukuti Yehova Lesa alikwete amaka ya kubapususha, amashiwi yaba muli ili ilumbo yalebebukishako ifintu ifikalamba nga nshi ifyo Yehova acita. (Amalumbo 46:8) Fimo ifyo ili ilumbo lyalanda fyalengele balatontonkanya pa maka Yehova akwata aya kupwisha inkondo. (Amalumbo 46:9) Mu nshila imbi, Yehova alipwishishe inkondo mu nshita balelemba Baibo ilyo acingilile abantu bakwe ku nko ishalebasansa. Na lyo line, Baibo yalilaya ukuti Lesa akacingilila abantu bakwe ilyo akafumyapo inkondo mwi sonde lyonse.—Esaya 2:4.

Bushe Yehova acili alaafwa bakapepa bakwe na muno nshiku? E mukwai. Na kuba, umutumwa Paulo akoseleshe abena Kristu ukushintilila pali Yehova ukuti ewingabafwa. (AbaHebere 13:6) Amashiwi ayaba mwi Ilumbo 46 yalalenga twacetekela sana amaka Lesa akwata aya kutupususha. Kabili yalalenga tulemona Lesa wesu ukuti “e cubo cesu kabili e maka yesu.”—Amalumbo 46:1.

Tambeni iyi vidio iipi pa kuti mumone fimo ifyaba mwi buuku lya Amalumbo.