Twalyangushako Ifyo Tucita pa Kupulinta Impapulo pa Kuti Tulebila ku “Bantu ba Misango Yonse”

Yehova Lesa afwaya ukuti ‘abantu ba misango yonse baishiba bwino bwino icine.’ (1 Timote 2:3, 4) Na lyo line, bamunyinefwe na bankashi e lyo na bonse abo tubilako imbila nsuma balanda indimi ishingi kabili ishalekanalekana. Cila mwaka, tulapulinta impapulo mupepi na 2 bilioni mu ndimi ishalekanalekana. Bushe tucita shani pa kuti tufumye impapulo ishilanda pa fyaba mu Baibo mu ndimi ishafula ifi? Kabili bushe tubomfya shani bwino imisangulo pa kubomba uyu mulimo?

Twalicefyako Ifyalo umo Tupulintila Impapulo Kabili Tulabomfya Amamashini Ayasuma

Muli ba 1980, twalepulinta impapulo mu ncende ukucila pali 40. Ukutula ilya nshita, twalicefyako incende umo tubombela umulimo wa kupulinta, ica kuti muno nshiku tubombela uyu mulimo mu fyalo fye 9. Nalyo line, nangu ca kuti pali ino nshita twalicefyako ifyalo umo tupulintila impapulo, impapulo tupulinta shena shalifulilako, ica kuti kwalilundwa indimi ukufika ku mapesenti nalimo 500! Cinshi calenga tulepulinta impapulo mu ndimi ishingi nangu ca kuti pali ino nshita tubombela uyu mulimo mu fyalo fye ifinono? Cimo icalenga ni co twalikwata ifya kubomfya pa kupulinta ifisuma.

Amamashini tubomfya pa kupulinta impapulo muno nshiku yalapulinta impapulo ishingi mu nshita fye inono. Akale twalekabila inshita iikalamba pa kuti tupwishe ukupulinta impapulo. Nomba apo twalikwata amamashini ayasuma muno nshiku, tatukabila inshita iikalamba sana pa kuti tupwishe ukupulinta impapulo. Tulapwisha bwangu umulimo wa kupulinta impapulo, kabili tulapulinta impapulo na mu ndimi isho abantu fye abanono balanda. Nomba ilyo tulepulinta, tulakabila ifya kubomfya ifipya ifyo beta ukuti ama printing plates. Mu myeshi fye 12, twalibomfya indalama ukufika ku madola 2 milioni, pa kushita ama printing plates aya kubomfya pa kupulinta.a Nomba nga tulepulinta impapulo ishinono, tubomfya amamashini aya shikabila ama printing plates. Aya amamashini, ukubikako na yabomfya ifyo beta ukuti laser technology, e yo tubomfya pa kupulinta impapulo ishinono kabili tatubomfya indalama ishingi pa kuti tupulinte impapulo.

Mu myaka itatu iyapita, twalibomfya indalama amadola ukucila pali 10 milioni pa kuwamya amamashini tubomfya pa kupulinta no kupanga impapulo mwi sonde lyonse. Moneni ifyo tubomfya aya ama mashini pa kupulinta amaBaibo. Akale, bamunyinefwe balekabila ukucita fintu ukucila pali 40 pa kuti fye bapwishe ukupanga Baibo. Pa numa ya kupulinta, balecita ifintu pamo nga ukubila, ukuputula no kukuusa. Na kabili, pa kufumya amaBaibo pa ncende imo apo tulebombela no kuyatwala pambi, tatwalebomfya ama mashini. Twaleimya fye ku minwe. Muno nshiku, bamunyinefwe bacita fye ifintu 10 pa mulandu wa kuti twalikwata amamashini ayo tubomfya pa kubomba imilimo imo iyo twalebomba akale, kabili aya yene amamashini eyo tubomfya na pa kusenda amaBaibo no kuyatwala pa ncende imbi apo tulebombela. Kanshi twalicefyako sana imilimo imo iyo twalebomba (ukucila pa mapesenti 55) pa kupulinta amaBaibo. Pa Bethel ya ku Japan, umo babombela umulimo wa kuputula, ukupeta no kukambatika pa kuti bapange amaBaibo, balepwisha ukupanga amaBaibo 2,000 mu ma-awala 8. Muno nshiku, amaBaibo ukufika kuli 35,000 eyo bapwisha ukubombelapo mu nshita fye imo ine!

Ifi Tushisunga Impapulo Ishingi, Tatubomfya Indalama Ishingi Sana

Ifi fyonse twalandapo fyalilenga twalabomfya bwino imisangulo. Ku ca kumwenako, pali ino nshita tatupulinta impapulo ishingi sana pa muku umo, ici cilalenga twilasunga impapulo ishingi mu fifulo tupulintilamo impapulo. Ba Gary, ababombela pa Bethel ya ku United States balandile ukuti: “Pa kubala calitukosele ukumfwikisha ukuti ukupulinta impapulo ishinono libili libili kwali fye bwino. Twalemona ukuti icingawama kupulinta impapulo ishingi mu nshita mu nshita.” Ba Gary balandile no kuti: “Mu mwaka fye wakubalilapo ilyo twatendeke ukupulinta impapulo ishinono libili libili, twabomfeshe indalama ukufika ku madola 60,000 ukushitamo ama printing plates e lyo na ku mapepala yaonaike. Na lyo line, twalisheleko ne ndalama ukucila pa madola 1.5 milioni muli ulya mwaka isho twali no kubomfya pa kusunga amapepala ne mpapulo isho twali no kupulinta!” Ishi ndalama tulashibomfya na ku fintu na fimbi ifyacindama pamo nga ukukuula Amayanda ya Bufumu na mu kusakamana abaponenwa na masanso ayakalamba.

Pa mulandu wa kuti nomba tatukabila ukusunga impapulo shapulintwa ishingi, twalikwata incende iikulu umo twingasungila ifintu fimbi pa ma Bethel yesu yamo. Kabili ishi ncende kuti bashibomfya ukubombelamo imilimo imbi iyo babomba pa Bethel. Na kabili, apo twalicefyako impendwa ya ma Bethel umo tubombela umulimo wa kupulinta, calilenga twilakuula ama Bethel ayakalamba sana. Ku ca kumwenako, mu 2018, umulimo wa kupulinta uo balebombela pa Bethel ya ku Britain, batendeke uku-ubombela pa Bethel ya mu Central Europe e lyo na mu ncende shimbi umo babombela uyu mulimo. Ukucita ifi kwalengele tusunge indalama ishingi sana ishali no kubomba pa kukuula Bethel ya mu Chelmsford, ku England.

“Namunjibukisha!”

Icacindama sana ca kuti, ifi twa-angushako ifyo tubomba umulimo wa kupulinta impapulo fyalilenga abantu abengi bapalama sana kuli Yehova. Kabili tulapulinta impapulo mu ndimi ishingi, na lintu tulekabila fye impapulo ishinono. Ku ca kumwenako, abantu fye nalimo 35,000 abekala mu New Caledonia, mu Wallis, na mu Futuna e balanda ululimi lwa ciWallisian. Na lyo line, mu August 2024, twalifumya Baibo yonse iya Amalembo ya Calo Cipya iya mu ciWallisian. Ba Selafina, bakasabankanya abalanda ululimi lwa ciWallisian balandile ukuti: “Nalefilwa ukwishiba ifyo amashiwi yamo ayo nalebelenga muli Baibo ya ciFrench yalepilibula. Kanshi ilyo twapokelele Baibo ya mu ciWallisian, nalilukwishe ifilamba. Napepele kuli Yehova ukuti, ‘Mwe Yehova, namunjibukisha! Ni mwe Lesa uushaba na kapaatulula.’”

Nangu ca kuti mu Democratic Republic of the Congo mwaba fye abantu ukucepako pali 500,000 abalanda ululimi lwa ciSanga, icitabo citila Kuti Mwaba ne Nsansa Umuyayaya! calipilibulwa muli ulu lulimi. Ba Josué ababa mu cilonganino icibomfya ululimi lwa ciSanga, balandile ukuti: “Twalingile ukubombesha sana pa kupilibula nelyo ukulondolola amashiwi yamo ku basambi ba Baibo. Nomba inshita shimo, abasambi bandi aba Baibo tabaleumfwa ifyo icitabo calelandapo. Kanshi twaliba sana ne nsansa ifi twakwata ici citabo mu ciSanga! Pali ino nshita, abasambi bandi aba Baibo balomfwikisha ifya mu Baibo ifyo basambilila ukubomfya ici citabo, kabili nshikabila no kulondolola ifingi pa kuti fye bomfwe.”

Tulapulinta no kusabankanya impapulo ishingi ishilanda pali Baibo ku bantu abengi kabili mu ndimi ishingi ukucila ifyo cali kale. Imisangulo musangula, ukubikako ne yo musangula ukubomfya donate.jw.org, ilatwafwa ukubomba uyu mulimo. Tulatasha sana pa fyo muipeelesha ukusangwilako.