Umukululo wa Mepusho

◼ Bushe tulingile ukutoota lyonse fye pa numa ya lyashi mwi Sukulu lya Butumikishi Ilya Bulesa na mu Kulongana kwa Mulimo?

Ilyo Kabumba, Yehova, ashimpile isonde, “intanda sha lucelo shayawilile utupundu pamo, na bana baume bonse ba kwa Lesa baliweleshe.” (Yobo 38:7) Imitima ya aba bana baume ba kwa Lesa, bamalaika, yalefwaya sana ukulumbanya Yehova pa mulimo usuma uo abombele, uwalelangilila inshila ipya iyo bashatalile abamonapo kale ukuti Lesa wa mano, musuma, kabili wa maka.

Na ifwe cisuma ukulangilila ukuti ukutasha tuletasha kwa cine cine pa kubombesha uko bamunyinefwe babomba pa malyashi ayo balanda nangu ifilangililo ifyo bacita mu cilonganino. Ica kumwenako fye, ilingi line tulatoota umuntu nga alanda ilyashi pa kulongana kukalamba. Umuntu pa kuti alande ilyashi pa kulongana kukalamba alingile ukupoosapo inshita iikalamba no kubikako sana amano. Ukutoota tutoota kulangilila ukuti tuletasha pa kubombesha kwa kwa munyinefwe uwalanda ilyashi e lyo no kutasha Yehova pa kufunda uko atupeela mu Cebo cakwe e lyo na mu kuteyanya kwakwe.—Esa. 48:17; Mat. 24:45-47.

Bushe kuti twatilapo shani pa kutoota pa numa ya malyashi mwi Sukulu lya Butumikishi Ilya Bulesa e lyo na mu Kulongana kwa Mulimo? Takwaba ifunde ilyabinda ukutoota nga ca kuti cifumine pa nshi ya mutima, nga filya ciba nga ca kuti e muku wa kubalilapo uo umusambi mu sukulu alanda ilyashi. Nomba kwena, nga tatucenjele ukutoota kuti kwaba fye ukwa citootetoote ukwabula no bupilibulo. E ico kanshi tatulingile ukulatootela umuntu onse fye uwalanda amalyashi.

Nangu ca kuti tatulingile ukutootela umuntu fye onse uwalanda ilyashi mwi Sukulu lya Butumikishi na mu Kulongana kwa Mulimo, kwaba inshila na imbi iyo twingatashishamo munyinefwe pa kufunda bwino mu kulongana na pa kubombesha kwakwe mu lyashi alandile. Kuti twalanga ukutasha nga tulebikako sana amano ilyo bakalanda balelanda amalyashi. E lyo pa numa ya kulongana, kuti twayabatasha pa fyo bapekenye bwino sana ilyashi.—Efes. 1:15, 16.