Bushe Abantunse Kuti Bapwisha Ubupiina?

ABANTU abengi balikula ukwabula ukwishiba ifyo ukucula kwaba. Tabatala abasendamapo insala nangu ukusendama ukwabula ukufimbana mu nshita ya mpepo. Lelo, abengi pali aba bantu balomfwila abacula uluse kabili balesha na maka yabo ukubafwa.

Nangu cibe fyo, ubupiina, bucili bulecululusha abantu abapumwa ne nkondo sha bana calo, ilyeshi, icilala, na mafya yambi. Ifi fintu e bwafya bwabipisha ubo abalimi abengi mu Afrika balolenkana na bo. Bamo balipatikishiwa ukufuma uko bekala no kukuukila ku misumba ikalamba nangu ukuba imbutushi mu fyalo fimbi. Bambi na bo balakuukila ku matauni pa mulandu wa kuti balabelelekwa ukuti e kwaba imikalile isuma.

Mu matauni umwaba cinkupiti wa bantu e mo ubupiina buleilako fye pa muulu. Ilingi line incende ya kulimapo ifya kulya iishalako inono sana. Incito na yo yalyafya ukusanga. Pa mulandu wa kupelelwa, abengi basanguka bantalamisoka. Abekala mu misumba balalomba ubwafwilisho, lelo amabuteko ya buntunse tayakwata amaka ya kupwisha ubu bwafya ubuleya bulekulilako fye. Lipoti wa ba United Nations uwafumine muli The Independent iya ku London iya mu November 2003, atile: “Abantu abengi sana bali ne nsala mu calo.” Uyu lipoti alundileko no kuti: “Ukushinguluka isonde lyonse nalimo abantu amamilioni 842 pali lelo tabalya ifya kulya ifisuma—kabili kuli ico cipendo kulelundwa amamilioni 5 cila mwaka abashikwata ifya kulya fisuma.”

Umusambo wa Nte sha kwa Yehova uwa ku South Africa inshita shimo ulapokelela amakalata ukufuma ku bapiina. Ku ca kumwenako, umwaume umo ku Bloemfontein alembele ukuti: “Ndi lofwa, e ico njiba fye mu tauni nga nashuka. Nga nshibile, ninshi twakulalaala fye insala no kupumwa ku mpepo. Takwaba incito nakalya. Abengi balulumba fye mu misebo ukulafwaya incito no to bengalya. Kwaba na bamo abatoola fye ifya kulya mu ng’ungulu. Bambi na bo balaipaya. Abengi pamo nga ine balipopomenwa kabili tabakwata isubilo. Cilemoneka kwati takuli isubilo lya kuti ifintu fikawama ku ntanshi. Bushe Lesa uwatupangile no kufwaya kwa kuti tulelya no kufwala, tamona fyonse fi?”

Kwaliba amasuko ya kusansamusha ku mepusho ayo uyu mwaume aipwishe. Nge fyo icipande cikonkelepo calalangilila, amasuko yasangwa mu Cebo ca kwa Lesa, Baibolo.