Mateo 6:34—“Mwilasakamano bwa Mailo”

“Mwilasakamikwa pa bushiku bwa mailo, pantu ubwa mailo bukaba na masakamika ya buko. Amafya ya mu bushiku bumo yalilinga kuli ubo bwine bushiku.”—Mateo 6:34, Amalembo ya Calo Cipya.

“Mwilasakamano bwa mailo, cila bushiku isakamiko lyabuko lyalilinga.”—Mateo 6:34, Amashiwi ya kwa Lesa Baibolo ya Diocese of Mbala.

Umwalola Amashiwi Yaba Pali Mateo 6:34

Yesu uwalandile aya amashiwi, alekoselesha abalekutika ku fyo alelanda ukuti tabalingile ukusakamana sana pa mafya bali no kukwata ku ntanshi. Lelo balingile ukulabombela fye pa mafya ya cila bushiku, nelyo ayo bakwete pali ubo bushiku.

Yesu taloseshe mu kuti tatulingile ukutontonkanya pa fikacitika ubushiku bukonkelepo nelyo ukupanga ifyo tukacita ku ntanshi iyo. (Amapinda 21:5) Lelo alefwaya twishibe ukuti tatulingile ukusakamana sana pa fingacitika ubushiku bukonkelepo. Ukulasakamana sana kuti kwalenga twaleka ukuba ne nsansa kabili kuti twafilwa ukubika na mano ku fyo tulecita pali ubo bushiku. Ukusakamana sana te kuti kulenge twapwisha amafya tukakwata ku ntanshi. E lyo ilingi line ifilenga tulesakamana sana tafisa na mu kucitika nga fintu twaletontonkanya nelyo tafisa mu kubipa sana nga fintu twale-enekela.

Amashiwi Yambi Ayaba pa Fikomo Fimbi Muli Mateo Icipandwa 6

Amashiwi yambi ayo Yesu alandile mu Lyashi lya pa Lupili, yalembwa muli Mateo icipandwa 5 ukufika ku 7. Mu Lyashi lya pa Lupili ilyo Yesu alandile, alondolwele ukuti nangu twingasakamana shani, te kuti tulundeko insansa nelyo ukulundako ubumi bwesu nangu fye ni panono. (Mateo 6:27) Na kabili alandile no kuti nga twabika Lesa intanshi mu bumi bwesu, tatwakulasakamikwa sana pa fikacitika mailo. Lesa alibika amano ku fimenwa na ku nama kabili akulasakamana aba mupepa.—Mateo 6:25, 26, 28-33.