Ifya Kubomba mu Cifulo Cibombelwamo Libili Libili
1 Bushe icilonganino cenu cilefimba icifulo ca ciko ica kubombelamo libili libili? (Mat. 24:14; 1 Tim. 2:3, 4) Nangula ca kuti ici cileta ukusonsomba kwaibela, ukubelesha kwalanga ukuti uku kusonsomba kuti kwabombwapo nga ca kuti tuli abaipekanya bwino kabili abaipangasha ku kubomba ne mibele yalekanalekana iyo imako.
2 Imitendekele Ifumamo Cimo Yaba E Lufungulo: Caliba icakatama ukuba uwaipekanya ku kubomfya imitendekele imo nelyo iyafulilako iyatontonkanishiwa mu kusakamanisha. Ilingile ukusanshamo ukulandapo kwa kulungatika uko kulenga imilandu yakatama iya kutandala kwesu ukwa libili libili ukuba iyaumfwika.
3 Icitabo ca Ukupelulula cipeela ifya kumwenako fishaiwamina ifingi ifya mitendekele yalinga iya kubomfya. Itatu yatantikwa pe bula 15 pe samba lya mutwe “Mu Cifulo Cibombelwamo Ilingi.” Pituluka muli iyo wingatemwa ukubomfya mu cifulo cobe ica kubombelamo.
4 Bakasabankanya bamo balatunguluka pa kubomfya amalyashi ukufuma mu nyunshipepala ya cikaya ku kutendeka ukulanshanya mu cifulo cibombelwamo libili libili. Icitabo ca Ukupelulula cipeela ifya kumwenako fitatu ifya fintu ici cingacitwa. Languluka imitendekele yalenga bubili pe samba lya mutwe “Imisoka/Ukucingililwa” pe bula 10 ne mitendekele ya kubalilapo ibili pe samba lya mutwe “Ifiponako Fya Nomba Line” pa mabula 10 na 11.
5 Imitendekele iyo Upekanya: Yumfwe uwakakuka ukulundulula no kubomfya ukulandapo kwa kutendekelapo ukwalinga ukukonka ica kumwenapo ca yaba mu citabo ca Ukupelulula. Lumbulula iyi mu nshila yobe iya cifyalilwa kabili ukubomfya amashiwi yobe. Kuti wapituluka muli yene na kasabankanya wabelesha pa ntanshi ya kubomfya yene mwi bala.
6 Ku ca kumwenako, kuti wasosa icapale ci:
◼ “Ukutula apo twamutandalile, [lumbula ica kucitika ca nomba line ico abantu mu bwikashi balelandapo]. Apantu ifwe bonse natwambukilwako mu nshila imo nelyo iibiye, abena mupalamano besu abengi balilumbulula ukwangwako kwakakala. Nakalimo ne mwe bene mwalicitontonkanyapo. [Pemwina panono ku kusuminisha wene ukwankulako nga cingacitika.] Mu cilola ca mibele ya calo ilelo, bushe te kuti musuminishanye na cintu kasesema Yeremia alembele mu cipandwa 10, icikomo 23?” Pa numa ya kubelenga ilembo, ipusha mwine ŋanda imimwene yakwe, lyene alwila ukusakamana kwi lembo lya kulungatika ilyo lilangisha ifyo Yehova akapikulula impika mulelanshanyapo.
7 Nelyo kuti watila:
◼ “Ukwabulo kutwishika mwacumfwa mwi lyashi lya pa mulabasa ilelo [lumbula ica kucitika cimo ica kulungatika]. Nakalimo kuti mwasumina ukuti ici cileambukila ifwe bonse. [Pemwina panono ku kusuminisha wene ukwankulako nga cingacitika.] Kuti twasubila ifyo amabulashi kuti yaletako ukupikulula kwa pa kashita akepi; nangu cibe fyo, Baibolo ilangisha ifyo impika ikapikululwa mu kubelelela.” Losha ukusakamana kwi lembo limo ilyo lilondolola ico Lesa akacita.
8 “Mulandu Nshi Mutandalila Libili Libili?” Ukwankulako kwalinga kuli ici cingaba ica kucilikilo kulanshanya kwalipeelwa mu citabo ca Ukupelulula pe bula 20 pe samba lya mutwe “Mulandu Nshi Imwe Mwe Bantu Mutandalila Libili Libili?” Nelyo fye nga tatwipushiwe, kuti twapeela ubunte bwawamisha nga ca kuti twashukila akashita kalinga akali konse ku kwaafwa bambi ukutesekesha ukuti ukutemwa kwine kwine ukwa kuli Lesa no mwina mupalamano kulatukunta ukutandala imiku iingi ukufika pantu twingapesha. Ukulanshanya kwa mashiwi ya kwa Yesu pali Yohane 21:15-17 kuti kwashininkisha ukuba ukwa kunonsha muli uku kuloshako.
9 Ukufikila Yehova atila pafula, lekeni tutwalilile ukubomba no kusonsomba kwa kubomba mu cifulo cibombelwamo libili libili. Mu kuba no yu mupampamina, kuti twaba abaebekeshiwa ulwa butungulushi bwakwe, ukucingilila, ne paalo ukufika fye na ku mpela.—Mat. 28:19, 20.