Isambililo lya pa Lobe Waba Mulandu wa Kwangwako

¹ Milandu nshi iyo tulingile ukwangwako mu kusakamanishisha? Tulingile ukuba abayangwako apakalamba pa lwa kukuulilila no kusungilila ukwampana kwapalamisha na Yehova. Isambililo lya pa lwesu lilabomba ulubali lukalamba mu kulundulula isenge lya musango yo. Ilelo, banono pali ifwe abakwata imibele iibasuminisha ukupoosa ifiputulwa fya nshita ifyaleepa pa kwetetula na pe sambililo lya pa lwabo. Lelo, nga ca kuti tatulebelenga Icebo ca kwa Lesa lyonse, kuti twaba abanaka ukufika ku cipimo ca kukanakwata ubukose bwa kucincintila umupashi wa ku calo no lunkumbwa lwa ciko ulwa bumubili.

² Fulukeni Icebo: Lintu mu kubalilapo fye twasambilile pa lwa mifwaile ya kwa Lesa, mu kupalishako twali abaswatuka ukunonka ukwishiba kwafulilako. Pa ciputulwa ca nshita, nangu cibe fyo, insala yesu iya ca kulya ca ku mupashi pambi yalifumfulila. Kuti pambi kwabako ukukabila kwa ‘kufuluka’ ica kulya ca ku mupashi. (1 Pet. 2:2) Ni shani fintu twingalundulula ukufuluka kwa musango yo?

³ Icena ca fya kulya fyatemwikwa cilabalamuna insala pa kuletako ifibukisho fisuma. Ifiputulwa fya nshita ifipi ifye sambililo lya pa lwesu kuti fyatwambukila mu nshila yapalako lwa ku mupashi. Ukuipakisha ifiputusha fyalinga ifyanona ifya ku mupashi kuti pambi kwabalamuna insala yesu iya cine cashikilako. Ukwikushiwa uko kwisako pa numa ya kusambilila kuti pambi kwatukoselesha ukusokota mu kushikilako mu Cebo ca kwa Lesa.

⁴ Lundulula Icibelesho Icingakuwamina: Bamo balapaatulako icungulo bushiku conse ku kucita isambililo lya pa lwabo, ilintu bambi basalapo ifiputulwa fya nshita ifipi kabili ifyacilapo kukonkana ifya kusambilila. Nga ca kuti wasanga ifyo kuti watontomesha mu kuwaminako ulucelocelo, kuti pambi wapingulapo ukukwata isambililo pa ntanshi ya mwikulo. Nga ca kuti ucilapo kuba uwaswatuka icungulo bushiku, kuti pambi wasoobolapo ukukwata isambililo lyobe pa ntanshi ya kusendama ubushiku. Icili conse ico wasalapo, icintu cacindama kuba uwa lyonse no kukakatila ku cibelesho icingawamina ukukabila kobe.

⁵ Lintu twakoseleshiwa ukufushako isambililo lya pa lwesu, kuti twayangufyanya ukusosa ati kale kale twalikwata ukutantika kwakumanina. Nangu cibe fyo, ifwe bonse tulekabila ukuba abafumacumi mu kupimununa fintu tubomfya inshita yesu. Bushe amaawala ayengi cila bushiku yapooswa ukutamba amaprogramu ya pa televisioni? Bushe twaliba abaitemenwa ukuipusula amabuseko ya pa lwesu yamo? Ukubebeta kwasakamanishisha ukwa fyo tubomfya inshita yesu mu kupalishako kukasokolola inshita iyo cila bushiku ingabomfiwa mu kucilapo kuwama mwi sambililo lya pa lwesu.—Efes. 5:15, 16.

⁶ Ukusambilila Icebo ca kwa Lesa kwawaminwa ukusakamana kwesu ukwakumanina. Ukwesha ukucita icintu capusanako ilyo tulesambilila kulacefya ubunonshi. Nga ca kuti twaba abakongamina ku kusambilila ilintu tulelya, ukukutika kuli radio, nelyo ukutamba televisioni, mu kupalishako tatuli na kutontomesha pa co tuleesha ukusambilila. (1 Tim. 4:15) E co kuliko ukukabila kwa kutamyapo ifya kupumbula.—Mona Icitabo ca Kutungulula Isukulu, amabula 35-6.

⁷ Isambililo lya cila bushiku no kubomfya ukufunda kwa Baibolo fyaliba ifyacindama pa mulandu wa kuti fyaba e nshila tupokelelamo ubutungulushi ukufuma kuli Yehova. Cipange ubuyo bobe ukufumya icine mu fitabo no kucibika mu mutima obe. Shukila akashita akali konse, te mulandu na fintu kengepipa, ku kubelenga, ukupitulukamo, nelyo ukwetetula pa fintu fya ku mupashi.—Amala. 6:6-8; Kol. 1:9, 10.