Twabombele Shani mu May?

Cali ca kulengo buseko ukumona abantu 258 babatishiwa mu May. Ukulembesha kwapokelwe ukupya kwali 775 ukulinganishiwa kuli 695 ukwa May wa mwaka wapwile. Bushe kuti twaafwa abafulilako ukunonka ubumi ukupitila mu kuwamyako ukwakanamo kwesu mu mulimo wa mwi bala? Shi natukabomfye mano mano inshita yesu mu myeshi iileisa pa kuti imyeo yafulilako ingapusushiwa pa kuti Yehova Lesa engacindikwa. Tulekoseleshiwa apakalamba kuli ubu bushininkisho bwakulisha ubwa kuti ipaalo lya kwa Yehova lili pa kubombesha kwesu ukwa ‘kulenga abasambi’ nga fintu twakambishiwe na Yesu. Bushe kuliko umulandu uo twingenekelela ubushininkisho bwalundwapo ubwe paalo lya kwa Yehova mu kwingilishiwako kwa bakasabankanya? Ee, kuciliko abantu aba mitima ya bufumacumi abengi abalefwaya ukubombela Yehova kabili abankulako ku bunte bwesu, ici cilesanshako abana banono abengi ne misepela ababishanya ne filonganino fyesu, lelo abashakana mu kushimikila kwa pa cintubwingi, kabili abashilatendeka ukupendwa nga bakasabankanya. Balekabila ukwaafwa kwesu.

Pa lubali lumbi, lipoti wa May alelangilila ukuti amaawala yapooselwe mwi bala, ifitabo, na bamagazini ifyashalikwe, ifipempu fya kubwelelamo na masambililo ya Baibolo ayatungulwilwe fyonse nafibwela pa nshi nga twalinganya no mweshi umo wine uwa mu mwaka wapwile. Ici cili pa mulandu wa kuti ifilonganino 728 tafyatumine lipoti, ukulenge mpendwa yonse iya malipoti yashatuminwe kwi ofesi lya musambo ukufika kuli 2,987 muli uno mwaka wa mulimo. Nangu cibe fyo, apantu ifilonganino ifingi nomba fikalasha amalipoti pa cifulo apo icimbayambaya ca Sosaite cisha ifitabo, tulesubilo kuti cila mweshi tukalapokelela lipoti uwakumanina.