Ifipempu fya Kubwelelamo mu Kuba ne Mifwaile

¹ Lintu wacite cipempu ca kubwelelamo, ulingile ukutukuta ukubomfya ilembo ilikalenga umuntu ukwishibilapo ifyalundwapo pa lwa mutwe wa lyashi uwa mu Baibolo uo mwalanshenye inshita yafumako.

² Ubuyo bumo ubwa kucitila ifipempu fya kubwelelamo ukwashalikwe bamagazini bwaba kusangako abengalapokako bamagazini lyonse. Imipeelele yayanguka ukupala iyi kuti pambi yabomba bwino:

◼ “Ndesubila mwaliipakishe icipande ca mu Ulupungu lwa kwa Kalinda ulo namushilile icalelondolola umulandu tulingile ukutiinina Lesa. Ilelo ndetele icipande muli magazini wa “Loleni!” icikwete icipusho cileti, ‘Mulandu Nshi Ubumi Bwaipipile Fi?’ Ici cili cipusho icisuma, bushe te ifyo?” Kuti watwalilila pa kusoso kuti: “Amashiwi yalumbuka aya kwa Yesu pali Yohane 3:16 yalaya umweo wa muyayaya. Napaapaata shaleni na uno magazini no kukoseleshiwa ne subilo lyakosa ilyatambikwa mu Cebo ca kwa Lesa.” Lyene londolola ukuti ukabwelelako ku kutwala bamagazini bakonkelepo e lyo no kuyalanshanya ifyalundwapo pa cintu Lesa alaya umutundu wa muntu uwa cumfwila. Ibukisha ukuti cila nshita watwala bamagazini, kuti walemba icipempu ca kubwelelamo.

³ Nga ca kuti washalike magazini waleti “Icalo Cabulamo Inkondo—Lilali?” kuti pambi watila:

◼ “Ni shani fintu ubumi bwingaba pano isonde nga ca kuti takwali inkondo? [Leka asuke.] Lekeni imulange cintu Lesa alaya ukucita.” Belenga Ilumbo 37:10, 11, kabili londolola ifyo ifintu fikaba lintu ukufwaya kwa kwa Lesa kwacitwa pano isonde. Cinkulako umuntu cintu Yesu asambilishe abasambi bakwe ukupepela nga fintu calembwa pali Mateo 6:9, 10. Mwaafwe ukupelulula umwalola amashiwi ya kwa Yesu. Tambika ukulembesha kwa Ulupungu lwa kwa Kalinda nelyo Loleni! no kutantika ukubwelelako ku kulanshanya ifyalundwapo.

⁴ Nga ca kuti wabwelelako ku kulanshanya ifyalundwapo pa fipande fileti “Mulandu Nshi Ubumi Bwaipipile Fi?” kuti watendeka muli iyi nshila:

◼ “Inshita yalekelesheko lintu naishile, twalandile pa butali bwa nshita umuntunse ekalako. Ukwabulo kutwishika nga fintu mwamwene mu fipande fya muli Loleni!, basayantisti batambika isubilo lyacepesha ilya kutwaafwa ukwikalako imyaka ukucila pali 70 nelyo 80. Lelo bushe muletontonkanyapo shani pa co Baibolo yalaya? [Leka asuke.] Baibolo ilanga ukuti Lesa alikwatila umuntu icintu cimo icacilapo kuwama.” Lyene belenga Yohane 17:3, kabili londolola ifyo ukupokelela ukwishiba kwingatungulula ku mweo wa muyayaya. Pali ino nshita kuti pambi watambika isambililo lya Baibolo ilya mu ŋanda nelyo ukutantika ukulanshanya kumbi ukwa Baibolo.

⁵ Ukutampa isambililo lya Baibolo kwaba buyo bwacindama mu butumikishi bwesu. Napamo walitandalila umuntu uwapokelele bamagazini imiku yafulilako. Mulandu nshi te kwesesha iyi nshila umuku ukakonkapo ukatandala?:

◼ “Abantu balikwata imfundo shapusanapusana ishingi nga nshi pa lwa mipepele no bucindami bwa iko mu mikalile ya muno nshiku. Kwalibako ifisumino fyapusanapusana pa lwa mulandu Lesa asuminishisha ububifi nelyo umulandu tukotela no kufwa. Abantu bamo kuti bafwaya ukwishiba ifya kupepa no kumfwikwa kuli Lesa.” Kupukula lumo ulwa mpapulo shesu isha kusambililamo Baibolo pa mutwe uyo uleyumfwe fyo kuti wasekesha mwine ŋanda, kabili mu kwipifya langilila ifyo isambililo litungululwa.

⁶ Yehova ni Lesa wa mifwaile. Lekeni tumupashanye mu October pa kucite fipempu fya kubwelelamo mu kuba ne mifwaile.