Ukuipeela fwe Bene mu Kuitemenwa

¹ Kemba wa malumbo Davidi aseseme ukuti abantu ba kwa Yehova “bakaipeela”; uko e kuti, pamo nga “bakabomba ba kuitemenwa abaswangana.” (Ilu. 110:3, NW, utulembo twa mwi samba) Ici mu kushininkisha cilefikilishiwa pa kati ka ba bwananyina mwi sonde lyonse. Mu myaka ya mulimo ine iyapitapo, abantu ba kwa Yehova baliipeelesha ukubomba amaawala ukucila pali bilioni umo mu mwaka wa mulimo umo umo ku kwananya imbila nsuma iya Bufumu. Kabili kwalibako inshila ishingi isho twingaipeelelamo ku kwaafwa bambi mu kuitemenwa, ukulunda pa mulimo wa kushimikila no kupanga abasambi.

² Inshila Twingalangilamo Ukuti Tuli Abaitemenwa: Bamo mu cilonganino kuti pambi bakabila ukwaafwa pa kuya ku kulongana. Mulandu nshi te kuti muitemenwe ukubasendako? Bamo pambi kuti nabalwala, ukunakuka, nelyo ukutekwa mu cipatala. Bushe kuti mwaitendekelako ukubatandalila nelyo ukubafwilisha mu nshila imo? Nakalimo kuti kwabako umuntu umo nelyo ulupwa abo balekabila ukukoseleshiwa. Bushe mwalitontonkanyapo ulwa kulaalikako aba musango yo ukusangwa kwi sambililo lyenu ilya lupwa mu tushita mu tushita? Painiya nelyo kasabankanya nakalimo kuti akabila uwa kubomba nankwe mu butumikishi. Mulandu nshi te kuti muipeeleshe ukubomba nankwe mu mulimo? Ishi e nshila shimo isho twingabombelamo icisuma ku ba bwananyina bwa mu citetekelo.—Gal. 6:10.

³ Bamunyina kuti baitemenwa ukubomfiwa mu kuteyanya kwa kwa Yehova pa kutukusha ukufika pa milingo ya baeluda na babomfi batumikila. (1 Tim. 3:2-10, 12, 13; Tito 1:5-9) Ilyo tuletwalilila ukwingilishiwako, bamunyina bafikapo abo bali abaitemenwa ukutungulula mu kushimikila no kusambilisha no kucema ifilonganino, balekabilwa.—1 Tim. 3:1.

⁴ Nakalimo bamo aba ifwe kuti twaitemenwa ukubomfiwa mu mulimo wa kwa Yehova ukufika ku cipimo ca kulembesha nga bapainiya ba kwafwilisha mu tushita mu tushita. Lyene, na kabili, mu kuba no kuteulula kunono ukwalinga mu mibombele yesu iyatantikwa, nakalimo kuti twaba na maka ya kubomba bupainiya bwa kwafwilisha mu kutwalilila nelyo fye ukutendeka umulimo wa bupainiya bwa nshita yonse. Bushe imibele yesu kuti yatusuminisha ukukuukila ku ncende uko aba kwaafwa abengi baabulila? Bushe kuti twaipeela fwe bene ukubomfiwa ku kubomba pa Bethel na muli ifyo mu kulungatika ukubombako mu kulundulula umulimo wa mwi sonde lyonse? Umulimo ukalamba na kabili ulabombwa mu makuule ya Mayanda ya Bufumu, Ifiyanda fya Kulonganinamo, na maofesi ya misambo ukushinguluka icalo conse, uko aba kuitemenwa ukubomba balekabilwa apakalamba. Abo baipeela kuli iyi milimo isuma balatashiwa apakalamba, kabili balipaalwa mu kufumba!—Luka 6:38.

⁵ Ishi shili ni nshita shawamisha. Yehova, ukupitila mu mupashi wakwe, alepwishishisha umulimo wa kusungusha pe sonde ukubomfya abantu bakwe abaitemenwa! Ilyo lyonse Yehova, ukupitila mu kuteyanya kwakwe, atambulula ubwite bwa kubombako imilimo ileingilishiwako iya Bufumu, kuti cawama ukuipusha fwe bene ukuti, ‘Bushe ncili naliipeela mu kuitemenwa?’ Lyene mu kubamo ipepo tulingile ukubebeta umutima wesu ne mibele yashingulukako. Ukuipeelesha kwesu kuli bukapepa kukatukunta ukubombesha apo twingapesha mu mulimo washila, muli ifyo ukulenga umutima wa kwa Yehova ukusamwa nga nshi!—Sefa. 3:17.