Abakalamba Balashimikila Ukwabula Ukuleka
1 Ilyo abantu balekula, abengi benekela ukuleka incito yabo iya lyonse iya ku calo no kuipakisha ubumi bwa bwanalale mu myaka yabo iyashalako. Kuti bamona ukuti nababombesha icalinga kabili nomba balekabila ukutuusha. Nelyo kuti bafwaya fye ukuipakisha ubumi, mu nshita bashala na yo.—Luka 12:19.
2 Pamo nga ababomfi baipeela aba kwa Yehova, tumona ifintu mu nshila yapusanako. Twalishiba ukuti takwaba ukupoka penshoni mu kubombela Lesa. Imimwene yesu yaliba bwino pantu twenekela “umweo wa muyayaya.” (Yuda 21) Ukwishiba no kubelesha ifyanonkwa pa myaka iingi nalimo kuti fyalundako umucetekanya wa muntu no kushilimuka. Ici kuti calenga umo ukulundako amano no kushikatala no kutesekesha ubumi apakalamba. Iyi mibele yonse ilanonsha umo apakalamba pamo nga umutumikishi wa mbila nsuma.
3 Ukukota takwaba fye ku mubili epela; kusanshamo ne mibele ya muntu iya kutontonkanya. Nga mwenekela ukutantalisha inshiku shenu kabili mwaibikilishako ukusunga bwino umubili wenu, kuti mwatunguluka. Abakalamba kuti banonsha ubumi bwabo ukupitila mu kwingilishako ukwishiba kwabo ukwa ku mupashi no kwebako bambi.—1 Kor. 9:23.
4 Ifya Kumwenako Ifyacitika mu Cine Cine: Pa mushinku wa myaka 86, nkashi umo atile: “Lintu natontonkanya pa myaka 60 iyapitapo ukutula apo nasambililile cine, ubulayo bwacetekelwa ubwa kwa Lesa bulabukuluka mu mutima wandi. Ee, Yehova uubomba muli bucishinka ku ba cishinka alatulenga ukulobolola ubuseko bwapaka.” (Ilu. 18:25) Munyina umukoloci umo ebukisha fintu imfwa ya mukashi wakwe yamupumikishe icabipisha, na fintu mu kukonkapo ubumi bwakwe bwaishilebipa. Atile: “Nalyo line, ukupitila mu cikuuku ca pa fye ica kwa Yehova, nalipuupuutwike mu kulinga ica kuti naali na maka ya kutendeka umulimo wa bupainiya imyaka ibili pa numa. Fintu ndi uwa kutasha kuli Yehova ukuti ubumi bwandi bwaliwaminako mu cituntulu pa mulandu wa iyi mibombele yaingilishiwako iya kushimikila!”
5 Fintu twingatasha ukuti abakalamba abengi balipampamina pa kutwalilila ukushimikila ukwabula ukuleka ukufika pantu ubumi bwabo no bukose fingabafisha! Ukwabula ukutwishika balaula abati: “Mwe Lesa, mwansambilisha ukufuma ku bwaice; kabili ukufika kuli nomba nalongole fipesha amano fyenu.”—Ilu. 71:17.