Bikeni Umutima Wenu pa fya mu Muulu

¹ Ukulandapo pa nkulo twabamo ne mimwene ya iko pa lwa nshita ya ku ntanshi, icipande muli The New York Times ya December 31, 1994, casosele ukuti: “Baletiina inshita ya ku ntanshi. Baleitiinina ukulosha mu sha ncito, mu malwele, mu fya bunonshi, mu fya mibele ya calo.” Ukuli konse uko twalolesha, kuli ukutwishika pa lwa bumi. Ubutumikishi bwesu pamo nge Nte sha kwa Yehova bulenga ukuti cila bushiku tulekumanya abantu bayumfwe fi. Nangu cingati tulolenkana na mafya yamo yene nayo balolenkana nayo, icitetekelo cesu no kucetekela mu malayo ya cine aya Cebo ca kwa Lesa fitulenga ukukwata imimwene yapusana sana pa bumi ne nshita ya ku ntanshi iya muntu.—Esa. 65:13, 14, 17.

² Isubilo lyesu ne fyo tumona inshita ya ku ntanshi filenga abengi aba bufumacumi ukumfwa ku bukombe tubatwalila. Abengi abayumfwa abapopomenwa no kucushiwa balasansamuka ukulanda na ifwe. Bamo balasumina ukusambilila Baibolo na ifwe pantu balatemwa ifyo bomfwa. Nangu cibe fyo, inshita shimo, abantu pa kubala kuti bafwaya ukutulondolwela amafya yabo yonse. Nangu cingati inshita kuti yapooswa ukukutika ku masakamika ya umo, tatufwile ukulaba imifwaile yesu, iyaba kusambilisha abantu icine ca Cebo ca kwa Lesa.

³ Tulafwaya ukuba ne cililishi ku bafinininwa ne fisendo. Yesu alimike ica kumwenako lintu asosele ifyalembwa pali Mateo 11:28: “Iseni kuli ine, bonse mwe bacucutika kabili abafinwa.” Tufwaya ukukoselesha abantu mu nshila imo ine. Nangu cibe fyo, moneni, pa kusondwelela kwa cikomo 28, Yesu asosele ukuti: “Nalamupeelo kutusha.” Ico e cifwile ukuba imifwaile yesu. Tucite co ukupitila mu kushimikilako bambi amalayo yapembesula ayafuma mu Cebo ca kwa Lesa. Ukuba komfwa musuma kulangilila ukwangwako kwesu kabili calikatama ku kufikilisha umulimo wesu uwa kushimikila imbila nsuma iya Bufumu, ukwaafwa bambi ukwishiba ukuti Ubufumu e bukapikulula fye amafya ya muntu.—Mat. 24:14.

⁴ Umulimo wesu te wa ncenshi sha fya butuntulu bwa bumi. Mu cifulo ca ico, waba nga fintu umutumwa Paulo alondolwele, nga fintu tumona pali 1 Timote 4:6, ubutumikishi ubutontomesha pe “sambilisho lisuma,” ifisambilisho fisangwa mu Cebo ca kwa Lesa. Abakwete amafya ya pa lwabo nelyo aya mu nkuntu kuti bakabila ukukoseleshiwa ukushintilila pali Yehova. Basambilisheni ukutwalilila ‘ukubika imitima pa fya mu muulu’—ifintu fye subilo lya Bufumu. (Kol. 3:2) Lintu abantu batontomesha pa Cebo ca kwa Lesa, kuti bakuulililwa pa mulandu wa kusonga kwaluma cikwata mu bumi bwabo.—Heb. 4:12.

⁵ E co ubuyo bwesu bwa kwaafwa abantu ukutontomesha pa fintu ‘fya bulungami, ifya musangwela, ifyayemba, ne fya kutasha.’ (Fil. 4:8) Nga batontomesha pe subilo lya Bufumu, bakapaalwa nga fintu twapaalwa. Na bo bene bakakwata ubuseko bufuma mu kwishibo kuti Yehova mu kupelako akapikulula amafya yabo yonse ukupitila mu Bufumu bwakwe.—Ilu. 145:16.