Mube Bakacita—Te ba Kuumfwa fye Iyo
1 Abena Kristu ba cine ilelo balomfwila ukukonkomesha kwa Baibolo ukwa kuba bakacita wa cebo, te ba kuumfwa fye iyo. (Yako. 1:22) Ici cilabalekanya nga nshi na babombela Lesa ku milomo fye, nangu baitunga ukuti Bena Kristu. (Esa. 29:13) Yesu alondolwele mu kumfwika ati beka fye abacita ukufwaya kwa kwa Lesa e bakapusuka.—Mat. 7:21.
2 Ukupepa kwabula imilimo ya bukapepa kwa fye. (Yako. 2:26) E co tulingile tuipushe ati, ‘Bushe imilimo yandi ilanga shani ukuti icitetekelo candi caba icine cine? Cinshi cilange fyo cine cine njikala umwabela ico natetekela? Kuti nacita shani ukuti mpashanye Yesu mu kucishamo?’ Ifyasuko fyafumaluka kuli fi fipusho kuti fyatwaafwa ukumona ifyo twawamyako nelyo ifyo tulingile ukuwamyako mu kucita ukufwaya kwa kwa Lesa.
3 Apo tuli bakonshi ba kwa Yesu, ubuyo bwesu ubukalamba bufwile ukuba ngo bwalandile kemba wa malumbo ati: “Muli Lesa e mo tutakishisha akasuba konse, ne shina lyenu tuletootela pe.” (Ilu. 44:8) UbuKristu ni nshila ya bumi iimoneka cila bushiku na muli fyonse tucita. Fintu twikushiwa ilyo tulelanga mu fintu tucita fyonse ukuti tulafwaisha ukulumbanya Yehova no mutima wesu!—Fil. 1:11.
4 Ukulumbanya Yehova Takwapelela fye pa Kwikala Abatambalala: Nga myendele fye Lesa alefwaya ukuti iwame, nga twapoosesha fye amano ku kuwamya ubuntu bwesu. Lelo, ukupepa kwesu kusanshamo no kulondolole fisuma fya kwa Yehova no kubilisha apabuuta ishina lyakwe!—Heb. 13:15; 1 Pet. 2:9.
5 Ukubilisha imbila nsuma apabuuta ni imo iya milimo yakatama tubomba. Yesu aipeeleshe kuli uyu mulimo pantu alishibe fyo abengakutika kuti bakwata umweo wa muyayaya. (Yoh. 17:3) “Ukupyunga kwa cebo” kwalicindama na lelo line; e nshila yeka umo abantu bengapusukila. (Imil. 6:4; Rom. 10:13) Pa kwiluka ubunonshi ubwingi, kuti twaumfwikisha ico Paulo atukonkomeseshe ‘ukubile cebo’ no ‘kucincilila’ cene.—2 Tim. 4:2.
6 Kufika ku nshita nshi tulingile ukobelwa no kulumbanya Yehova? Kemba wa malumbo atile aletontonkanyapo akasuba konse. Bushe te fyo tuyumfwa? E fyo, kabili tukalamona uuli onse twakumanya ukuti ninshi kashita ka kulanda pe shina lya kwa Yehova. Tukafwaya amashuko yalinga aya kwalwila amalyashi yesu ku fya ku mupashi. Na kabili tukalatukuta ukubombako lyonse umulimo wa mwi bala uuteyanishiwa ne cilonganino. Abo imibele isuminisha kuti balangulukapo bupainiya, pantu e caafwa ukutangishako umulimo wa kushimikila mu bumi cila bushiku. Icebo ca kwa Lesa citulaya ukuti nga twakoselela mu kucita ukufwaya kwa kwa Lesa, tukapaalwa.—Yako. 1:25.