Fwayeni Ubufumu bwa kwa Lesa Intanshi—Lyonse pa Kutuula Amalambo ya Kutootela
1 Abo abafwaya Ubufumu intanshi lyonse baliba abaibukila ukulanda pa lwa kwa Yehova no kulanda pa lwa Bufumu bwakwe. (Ilu. 145:11-13) Cila bushiku kulabako amashuko ya mu nshita ku kucindika ishina lyakwe no kulanda pa lwa mbila nsuma. (Ilu. 96:2) Ukutootela Yehova kwali ca kucankilwamo kuli kemba wa malumbo uwabilishe ukuti: “Muli Lesa e mo tutakishisha akasuba konse.” (Ilu. 44:8) Nga ca kuti twayumfwa mu nshila imo ine, tukaba abaswatuka ukwakana mu butumikishi bwa Bufumu lyonse.
2 Yehova taimikako ififwaikwa fya kulungatika ukukuma ku bwingi bwa nshita tulingile ukupoosa mu butumikishi, lelo akoselesha ifwe ukulamutootela “lyonse.” (Heb. 13:15, NW) Nga ca kuti imibele ya pa lwesu yasuminisha, tulingile ukucipango buyo bwesu ukupoosa inshita imo ukutootela Yehova cila mulungu. Abo kale kale balecite fyo kuti pambi baba na maka ya kutantika imibombele yabo ku kubomba nga painiya wa kwafwilisha ukufuma ku nshita ne nshita nelyo fye pa cishinte catwalilila. Bamo abaipakisha umulimo wa bupainiya bwa kwafwilisha kuti pambi baba na maka ya kulembesha nga bapainiya ba nshita yonse.
3 Te mulandu ne mibele ya pa lwesu, bushe kuti cacitikako kuli ifwe ukwingilishako ilambo lyesu ilya kutootela? Ukupimpa kubimbulwa no kutesekesha. Isambililo lya pa lwesu ilya Cebo ca kwa Lesa lilalundulula ukutesekesha. Ukulongana kwa cilonganino kulatukunta ku kulumbulula uko kutesekesha mu nshila shibomba. Ukubishanya kwapalamisha na bakalumba bambi abapimpa kuti ‘kwatucincimushisha ku kubombe milimo isuma.’ (Heb. 10:24) Pa kushukila mu kukumanina ukupayanya kucitwa ne cilonganino, kuti pambi twaba na maka ya kwingilishako ilambo lyesu ilya kutootela.
4 Kasesema mwanakashi Ana aimike ica kumwenako cishaiwamina mu mulimo wa kwa Yehova. Nangu cingati aali ne myaka ya bukulu 84, “talefuma pe tempele; ubushiku na ’kasuba alepyungila Lesa.” (Luka 2:37) Ukuibimbamo kwakwe ukwa mutima onse mu mibombele ya cilonganino kwamuletele ukwikushiwa kwa pa lwakwe ukwakulisha. Ubulondoloshi bwa Baibolo ubwa mulimo wakwe uwa bucishinka bulapayanya ukukoselesha kuli ifwe ilelo.
5 Paulo atashishe ukuti abo abali na “maka [bafwile] ukusende fya kunakuka fya bashaba na maka.” (Rom. 15:1) Mu kupalishako kwalibako bamo mu cilonganino cobe abakanonkelamo ukufuma ku kwafwilisha kobe ukwa cikuuku no kukoselesha. Ubwite ku kuya nobe mu butumikishi bwa mwi bala kuti pambi caba fye e cilekabilwa. Kasabankanya kuti pambi akabila imyendele nelyo umo uwa kubomba na o. Ukufuupulwa kuti pambi kwaba e mpika kuli umbi, kabili pambi kuti waba ni we wingapayanya ukutungilila kwa kukuulilila ukulekabilwa ku kupuupuutula ukupimpa kwa uyo muntu ku mulimo wa Bufumu. (1 Tes. 5:14) Ukuitemenwa kobe ku ‘kusangwila ifyobe mu kukabila kwa ba mushilo’ kulangisha ukufwaisha kobe ukwa kufuma ku mutima ku kwingilishako ukutootela ishina lya kwa Yehova.—Rom. 12:13.
6 Te kuti cicitikeko ukutantawila ifintu fyonse ifyo Yehova kale kale acita na fintu acili no kutucitila. Takwabako inshila twingabweseshamo kuli wene pali aya mapaalo. We milandu ya kukunta iyabako ku ‘cipema conse ukutasha Yehova’!—Ilu. 150:6.