“Sekeleleni Abantu Ababe Fi”

IFINTU tafyaleenda bwino mu cilonganino ca ku Korinti. Kwaliko umulandu wabipisha uwa bucisenene, kabili kwaliko amalekano pa kati ka bamunyina. Bamo balolenkene na mafya ya pa lwabo nelyo ukukwata ifipusho ifyalekabila ukwasukwa. Bamunyina bamo baletwalana ku filye; bamo balekaana fye no kuti takwaba kwima ku bafwa.

Ifipusho fyakakala na fyo fyalimine. Bushe abo baali mu mayanda yaakanikana bafwile ukwikala na banabo bashatetekela, nelyo bushe balingile ukupaatukana? Lubali nshi ulwakwete bankashi mu cilonganino? Bushe cali icalinga ukulyako inama iyaipailwe utulubi? Ni shani fintu ukulongana kulingile ukutungululwa—ukusanshako Umulalilo wa kwa Shikulu?—1 Abena Korinti 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Ukwabulo kutwishika pa mulandu wa kusakamikwa pa lwa bamunyinabo abaali mu mibele ya ku mupashi iyayafya iya musango yo, Akaiki, Fortunati, na Stefana baimine ubulendo bwa kutandalila umutumwa Paulo mu Efese. Ukulunda kuli ayo malyashi ya kusakamika ayaleumfwika, nalimo kuti balisendele kalata wa kutwala kuli Paulo ukufuma ku cilonganino umwali ifipusho pali iyi milandu. (1 Abena Korinti 7:1; 16:17) Mu kumonekesha, aba bamunyina batatu tabali e beka fye abasakamikwe pa lwa mibele. Paulo, na kuba, kale kale aali napokelela amashiwi ukufuma ku “bena Kloe” ukuti mwali ifikansa pa ba mu cilonganino. (1 Abena Korinti 1:11) Ukwabulo kutwishika, amashiwi yaletele ishi nkombe yayafwile Paulo ukumfwikisha mu kulengama ifyo imibele yali, ukuti apingulepo ukufunda uko aali no kupeela, ne fya kwasuka amepusho baipwishe. Kuti camoneke fyo kalata uyo nomba twaishiba nga Abena Korinti wa Ntanshi aali casuko ca kwa Paulo, icatungulwilwe no mupashi wa mushilo uwa kwa Lesa. Akaiki, Fortunati, na Stefana nalimo e batwele uyu kalata.

Bushe Akaiki, Fortunati, na Stefana bali ni bani? Cinshi twingasambilila ku kubebeta cintu Amalembo yasosa pa lwa bene?

Aba Ŋanda ya kwa Stefana

Aba ŋanda ya kwa Stefana baali e “fisabo fya ntanshi” ifyafumine mu butumikishi bwa kwa Paulo mu citungu ca ciRoma ica Akaya, ku kapinda ka kulyo aka Greece, mupepi no mwaka wa 50 C.E., kabili babatishiwe na Paulo umwine. Cilemoneko kuti, Paulo abalangulwike nge ca kuloshako, ica kusonga ca kulengo kushikatala ku bena Korinti. Alibatashishe mu cikabilila pa mulandu wa mibombele yabo balebombele cilonganino ukuti: “Awe ndemupaapaata, mwe ba bwananyina. Mwaishiba aba mu ŋanda ya kwa Stefana, ukuti e fisabo fya ntanshi fya mu Akaya, kabili baibika mu kupyungila abashila. Ndemupaapaata ukuti na imwe munakile ku bantu ababe fi, na kuli bonse abalemubombela pamo no kucucutika.” (1 Abena Korinti 1:16; 16:15, 16) Tacalondololwa mu kushininkisha abaali e “ba mu ŋanda” ya kwa Stefana. Inumbwilo kuti yapilibula fye aba mu lupwa lelo kuti na kabili yasanshamo abasha nelyo ababomfi. Apantu Akaiki lyali lishina lya ciLatini ilyaleimininako umusha, na Fortunati ilyaleimininako uwalubuka, abalandapo bamo belenganyo kuti aba babili kuti nakalimo baali ba mu ŋanda imo ine.

Te mulandu na fintu cali, Paulo alangulwike aba ŋanda ya kwa Stefana ukuti baali ca kumwenako. Aba muli iyi ŋanda “[baibikile] mu kupyungila abashila.” Ulupwa lwa kwa Stefana lufwile lwalishibe ukuti kwaliko umulimo wa kubomba ku kunonsha icilonganino na mu kuitemenwa bapokelele uyu mulimo nge cishingamo ca pa lwabo. Ukufwaisha kwabo ukwa kubombela abashila umulimo wa musango yo ukwabulo kutwishika kwawamine ukutungililwa no kutashiwa.

“Bapembulo Mutima Wandi ne Yenu Pamo”

Nangu cingatila Paulo asakamikwe pa lwa mibele yali mu Korinti, ukufika kwa nkombe shitatu kwalimucincimwishe. Paulo atila: “Ndesekelela pa kwisa kwa kwa Stefana na Fortunati na Akaiki, pantu baingila mu ncende yenu. Pantu bapembulo mutima wandi ne yenu pamo.” (1 Abena Korinti 16:17, 18) Lintu twalanguluka ifyo cali, ukulekana kwa ku mubili na bena Korinti nakalimo kwaleleta isakamika kuli Paulo, lelo nomba ukubapo kwa ntumi shabo kwafutile ukukanabapo kwa bonse aba mu cilonganino. Lipoti wabo mu kupalishako abombele ku kulenga Paulo ukwishiba fyonse no kufumyapo nangu fye kusakamikwa kumo uko akwete. Nakalimo ifintu tafyabipile ukulingana na fintu aelengenye.

Ukulingana na Paulo, ukutumwa kwa aba batatu takwapembwile fye umutima wakwe epela lelo na kabili kwabombele ukucincimusha umupashi wa cilonganino ca bena Korinti. Ukwabulo kutwishika cali kwilulukwa kuli bene ukwishibo kuti intumi shalilondolwele mu kumfwika ulubali ululi lonse ulwa mibele kuli Paulo no kuti baali no kubwelako no kupanda amano kwakwe.

E co Stefana na banankwe babili balitashiwe mu kukaba pa kucucutika kwabo mu kwimininako abena Korinti. Ukutasha kwa kwa Paulo pali aba baume kwalengele ukuti ilyo babwelelemo bengapayanya ubutungulushi mu cilonganino cayakanikene ica Korinti. Umutumwa acincisha bamunyina ati: “Munakile ku bantu ababe fi, na kuli bonse abalemubombela pamo no kucucutika. . . . Sekeleleni abantu ababe fi.” (1 Abena Korinti 16:16, 18) Ukutasha kukalamba ukwa musango yo mu kulengama kulelangilila bucishinka bwakumanina ubwa aba baume te mulandu no kukanshika kwali muli cilya cilonganino. Abaume babe fi balingile ukucindikwa.—Abena Filipi 2:29.

Ukubombela Pamo mu Busumino Kuletako Ifya Kufumamo Fishaiwamina

Ukwabulo kutwishika, ukubombela pamo mu kupalamisha no kuteyanya kwa kwa Yehova na beminishi ba kuko kulaletako ifya kufumamo fishaiwamina. Lintu Paulo alembele kalata nomba uwaishibikwa nga Abena Korinti wa Cibili, mu kwangufyanya pa numa ya kalata wa ntanshi, ninshi ifintu fileendako bwino mu cilonganino. Ukubomba kwatekanya ukwatwalilila ukwa bamunyina ukupala Akaiki, Fortunati, na Stefana, pamo no kutandala kwa kwa Tito, kwali nakuletako ifya kufumamo fisuma.—2 Abena Korinti 7:8-15; linganyeniko Imilimo 16:4, 5.

Ababa mu filonganino fya muno nshiku ifya bantu ba kwa Yehova kuti banonkelamo mu kwetetula pa kulumbula kunono ukwa aba baume ba busumino mu Malembo. Ku ca kumwenako, tutile nga imibele iyatwalilila mu cilonganino ca pa mwenu taingapikululwa mu kwangufyanya pa milandu ishishibikwe kabili yalenga bamunyina ukusakamikwa. Cinshi cifwile ukucitwa? Pashanyeni Stefana, Fortunati, na Akaiki, abashakwindile ku kushingamwa kwabo ukwa kwebako Paulo ulwa mibele kabili lyene mu kucetekela ukushiila imilandu mu maboko ya kwa Yehova. Ukupimpa kwabo takwabalengele napacepa ukuicitila ico balefwaya nelyo ‘ukububukila Yehova.’—Amapinda 19:3.

Umwine wa filonganino ni Yesu Kristu, kabili pa nshita yakwe umwine, nga fintu fye cali na mu Korinti, akabombapo ukupikulula amafya ayali yonse ayengaleta icintiinya ku mibele ya fiko iya ku mupashi no mutende. (Abena Efese 1:22; Ukusokolola 1:12, 13, 20; 2:1-4) Pali ino nshita, nga twakonka ica kumwenapo cishaiwamina icaimikwe na Stefana, Fortunati, na Akaiki kabili twatwalilila ukucucutika mu kubombela bamunyinefwe, na ifwe bene tukalatungilila ukutantika kwa cilonganino muli bucishinka, ukukuula bamunyinefwe, no ‘kulabacincimushisha ku kutemwa na ku milimo isuma.’—AbaHebere 10:24, 25.