Cikabila Ifwe Bonse pa Kuti Umulimo Ubombwe
1 Umusambi onse uwa kwa Yesu Kristu alingile ukumfwikisha ukuti calicindama ukubombesha ku kwafwilisha umulimo wa kushimikilo Bufumu no kuibimbamo. Yesu alishibe ukuti abasambi bakwe bali no kutwala ifisabo fya Bufumu mu bwingi bwapusanapusana. (Mat. 13:23) Nangu cingati ulubali lukalamba ulwa mulimo wa kushimikila ulebombwa na bapainiya babombesha abengi, bonse abatwalilila ukucindika Lesa mu kucincila ukupitila mu kutwala ifisabo ukulingana na po bengapesha baletashiwa.—Yoh. 15:8.
2 Ukubombela Capamo Kupwishishisha Ifingi: Yesu asobele ukuti ukubombesha kwa basambi bakwe bonse kwali no kucite milimo ukucila pa yakwe. (Yoh. 14:12) Ifwe bonse tulakabilwa pa kuti umulimo ubombwe, nampo nga imibele twabamo ilengo kuti tubombe fye ifinono nelyo ilatusuminisha ukupoose nshita ikalamba mu kushimikila Ubufumu. Cili fye nga fintu Paulo atile: “Umubili onse wasuminkaniwa no kupikaniwa ku mfyufyu shonse sha kulundilapo, umwabelo kubomba kwa mulingo wa cilundwa conse, ukulengo Mubili ukule.”—Efes. 4:16.
3 Bamo pambi kuti bayumfwa ifyo tabasangwilako sana. Nangu cibe fyo, mu menso ya kwa Yehova icacindama ca kuti umulimo wesu wa mweo onse. Fyonse ifyo tumucitila fyalicindama kabili alatasha.—Linganyeniko Luka 21:1-4.
4 Twalilileni Ukutungilila Umulimo: Ifwe bonse twalikwata ishuko lya kusangwilako lwa ku mubili ku mulimo wa mwi sonde lyonse. Bamo kuti baafwilisha ukupitila mu kubombako umulimo wa cibe uwabimbwamo mu kutungilila umulimo wa Bufumu. Uuli onse kuti aibikilishako ku kupeela ifyasuko fyapekanishiwa bwino pa kulongana no kulanda amalyashi mwi Sukulu lya Butumikishi bwa Teokrasi. Ukupitila mu kubomfya bwino inshita sha kukoselesha bambi, tulasangwilako nga nshi kuli bumupashi bwa cilonganino, ne ci cikosha icilonganino ku kubomba umulimo caseekeshiwa.
5 Cine cine, cikabila ifwe bonse ukuti umulimo ubombwe. Takuli uuli onse uulekabila ukuyumfwa ifyo tacindama mu kulenga umulimo ubombwe. Ukubombesha kwesu capamo, ukukalamba no kunono, mu kubombela Yehova kutulenga ukumoneko kuti e ifwe bakapepa ba cine fye beka aba kwa Lesa. (Mal. 3:18) Umo umo uwa ifwe kuti abomba ulubali lwacindama mu kucindika Yehova na mu kwaafwa bambi ukumwishiba no kumubombela.