Ifya Kusanga Ukusekelela Kukalamba mu Kulongana
1 Ukulongana kwalikatama pa kuti tube abatuntulu lwa ku mupashi. Ukusekelela tusangamo kwalilundana sana na cintu tucita ilyo tushilalongana, ilyo tuli mu kulongana, e lyo na pa numa. Ni shani fintu twingatwalilila ukusekelela apakalamba mu kusangwa ku kulongana? Ni shani fintu twingafwako na bambi ukucite ci?
2 Ilyo Tushilalongana: Ukupekanya kulambukila sana ukusekelela tuli no kusanga mu kulongana. Nga natuipekanya bwino, tulakutikisha kabili tulasukapo. Ukulundapo, tufwile ukupekanya bwino ilyashi ilili lyonse twapokelela pa kuti ifyebo fingabe fyalungika ukulingana na makambisho na pa kuti ibumba lingakutikisha. Tufwile ukupitulukamo sana. Nga twalenga ukuti ukulongana kube ukwacincimuka kabili ukwa kukuulilila kuli bonse, ukulunduluka kwesu kulamoneka no kusekelela kwesu kulakulilako.—1 Tim. 4:15, 16.
3 Mu Kulongana: Ukwasukapo mu kulongana kuti kwatwaafwa ukuipakisha kwene. Amalyashi ayalekabila ibumba ukwasukapo yalingile ukumonwa nga malyashi ayo batupeele ngo muntu umo umo mu cilonganino. Ilingi line amasuko ayepi kabili aya kulungatika e yawamisha. Ukushimika ifya kukumanya fya kukuulilila mu kwipifya kuti kwakoselesha no kucincimusha, e co tuleibukisha lyonse ukucite ci nga e filekabilwa mu kulongana. (Amapi. 15:23; Imil. 15:3) Ilyo tulelanda ilyashi mu kulongana, tulingile ukuba abacincimuka kabili abashininwa, ukulilenga ukumfwika bwino, ilya cine cine, kabili ililelanda pa ficitika.
4 Pa Numa ya Kulongana: Ukwebako bambi ifyebo ifisuma, ukubaposha mu nsansa, no kulandako na bo ifishinka fikalamba ifya mu kulongana kuti kwanonsha bonse. Ukusosa ifyo twacisekelela pa kumona abanono, abakalamba, na bapya baleasukapo kulakosha ukutemwa aba bwananyina. Mu cifulo ca kulengulula abashacisangwa ku kulongana, tulingile ukubashimikilako ifyo ukulongana kwaciba, muli fyo ukubakoselesha ukusangwako.—Heb. 10:24, 25.
5 Twiipusula uku kupayanya kwakatama ukwa kukoseleshanya. (Rom. 1:11, 12) Pa kuba abacincila lyonse, bonse kuti twatwalilila ukusekelela mu kusangwa ku kulongana kwa Bwina Kristu.