Cinshi Mukasosa ku MuYuda?
1 Mu mwanda wa myaka uwa kubalilapo, “abana ba kwa Israele” abengi balitetekele Yesu na batumwa bakwe. (Imil. 10:36) Nga fintu cali lilya, ilelo abaYuda bafumaluka abengi balepokelela icine no mutima onse—mu Israel, mu Russia, mu United States, na mu fyalo fimbi. Bushe kuti mwafwaya ukutunguluka ilyo muleshimikila abaYuda? Imitubululo yakonkapo kuti yamwafwa ukushimikila mu kushilimuka ku baYuda abaya ku kupepa na bashiyako.
2 Ukushimikila ku BaYuda Abaya ku Kupepa: Tufwile ukwibukisha ukuti abaYuda abaya ku kupepa ilingi line batemwisha ukukonka ifishilano fya cirabi ukucila ukulanda pa fifundisho fya kulungatika. Na kuba, bamona ifishilano ukuti fyalingana fye na Malembo yene. E co, tabafwaya sana ukulanshanya ifyashika fya mu Baibolo. Kabili bamona Baibolo ukuti libuuku lya Bena Kristu. Pali uyo mulandu, kuti cawama ilyo tulelanda pali Baibolo tulebomfya amashiwi ya kuti “Amalembo ya ciHebere,” “Torah,” nelyo fye ukuti “Amalembo.” Ulupapulo lushaiwamina ulwalembelwe sana sana abaYuda ni broshuwa wa mutwe wa kuti Will There Ever Be a World Without War?
3 Malyashi nshi abaYuda bengatemwa? Basumina ukuti kwaba fye Lesa umo, uwatemwisha nga nshi abantu. Basumina no kuti Lesa e ulenga ukuti ifintu fimo ficitike ku bantu. Kuti twasalapo ifya kulanshanya na bo pa fyo basuminamo. Ukulundapo, abaYuda abengi balishiba bwino bwino ifyo abaYuda banabo baculile mu Nkondo ya Calo iya 2. Balepusha umulandu Lesa asuminishishe ulufyengo lwa musango ulya kabili bafwaya ukwishiba lintu ububifi bukapwa. Tulaipangasha bwino ukwasuka ifipusho fya musango yo, nakalimo kuti twalanda pa fintu bamunyinefwe baculile mu Nkondo ya Calo iya 2.
4 Kwena, pa kukanafwaya ukufulwisha mwine ng’anda, cili bwino ukukanalanda pa lwa kwa Mesia ilyo fye mwatampa ukulanshanya. Lelo kuti mwalanda pa mulimo wa kwa Mose ku bena Israele no kwipusha mwine ng’anda nga alisumina ukuti ifyasambilishe Mose filabomba na pali lelo. Nga mwamona ukuti cakabilwa ukulanshanya pa lwa kwa Mesia, kuti mwatala mwabelenga Amalango 18:15, ayatila: “Kasesema wa mu kati kenu, wa muli bamunyinenwe, uwaba nga ine, Yehova Lesa wenu akamwimisha; e o mukaleumfwako.” Ipusheni mwine ng’anda uyo Mose aalelandapo. Lyene lanshanyeni ifishinka muli broshuwa wa World Without War, ibula 14, amaparagrafu 17 na 18.
5 AbaYuda Bashipepa Bena Balipusanako: Te baYuda bonse basumina mu buYuda. AbaYuda abengi tabapepa no kupepa. Ico fye bafwaya ca kuti abaYuda baikalile beka, balekonka ne ntambi shabo, ifishilano, na masomo, ukucila imipepele ya ciYuda. AbaYuda bamo abashipepa batila Lesa taishibikwa bamo bena basosa fye no kuti takwaba Lesa. E co, kuti tuleuma fye umwela nga twaikalila fye ukwambula Amalembo ya ciHebere. Kuti cawama ukulanshanya fye fintu mwingalanshanya no uli onse uushipepa. Ku ca kumwenako, kuti pambi mwalondolola ifyo Baibolo ibomba pali lelo. Nga ca kuti mwine ng’anda tasumina ukuti Baibolo yalipuutwamo, ifishinka fimo ifya muli broshuwa wa World Without War kuti fyabomba, maka maka ifisangwa mu ciputulwa pe bula 3 apaba umutwe wa kuti “The Bible—Inspired by God?” (Bushe Baibolo Yapuutilwemo na Lesa?)
6 Ilyo muleshimikila ku muYuda, kuti mwatila:
◼ “Fwe bengi twalifwilwapo abatemwikwa. Bushe kuti mwatila cinshi cicitika nga twafwa?” Lekeni aasuke. Lyene langeni mwine ng’anda umukululo uuleti “Death and the Soul—What Are They?” (Bushe Imfwa no Mweo Finshi?) pe bula 22 muli broshuwa wa World Without War. Umukululo ulinganya Amalembo pa lwa cicitika nga twafwa na cintu barabi basambilisha. Lyene kabiyeni kuli paragrafu 17 pe bula 23, kabili londololeni ukuti ukulingana na Malembo, abafwa bakabuukila mu paradise pano pene pe sonde. Tambikeni broshuwa. Ilyo mulepekanishisha ukubwelelako, kuti mwamweba ukuti icikolwe Yobo alisumine mu kubuuka. Mulangeni amalembo yaloshiwako pa mpela ya paragrafu 17, kabili mwebeni ifyo mukabwelelako no kulanshanya yene.
7 Mu mabuuku ya Mateo, Marko, Luka, Yohane, na Imilimo mwaba ifya kukumanya fya baYuda abakutike no kupokelela icine. Yehova acili alisula inshila ya ku mweo wa muyayaya. AbaYuda abengi abafumaluka kuti basambilila pa lwa kwa Lesa wa cine, Yehova, pa kuti na bo bene bengekala kuli pe na pe mu calo cipya ica kwa Lesa.—Mika 4:1-4.