‘Cinshi Ningacita?’
1 ‘Cinshi ningacita?’ Ukwabula ukutwishika, ici e cipusho abasambi ba Baibolo abali fye ibumba ilinono kabili abaletungululwa na Charles Taze Russell muli ba 1870 baletontonkanyapo. Ilyo baleya baleumfwikisha imifwaile ya kwa Lesa, balya basambi ba Baibolo aba mu kubangilila bafwile balelanguluka ica kucita pa kuti bengaafwa abantu bambi ukusambilila imifwaile ya kwa Lesa. Ukutwala ifyebo fintu balesambilila mu Baibolo ku bantu mu calo fye conse wali mulimo uukalamba nga nshi.
2 Twalimwenamo pa mulandu wa kuti balicimfishe bulya bwafya. Bushe bacimfishe shani? Cila umo umo abombele ulubali lwakwe nelyo cingati lwamoneke nga ulushacindeme, ica kuti na lelo line, Inte sha kwa Yehova shalishibikwa mu calo conse—ukuteyanya kukwete bakabilisha ba Bufumu mupepi na mamilioni 6 ababa mu filonganino mupepi na 90,000 mu fyalo 234 kumo ne fishi fya pali bemba!—Esa. 60:22.
3 Afwilisheni na Maka Yonse: Calikatama kuli umo umo uwa ifwe ukubombako umulimo ushaikulila uo Yesu asobele ukuti wali no kubombwa muli shino nshiku sha kulekelesha. (Marko 13:10) Ukwabula ukutwishika uyu mulimo tawingabombwa na baeluda beka ababa fye impendwa inono; atemwa ukulekela bapainiya beka ukubomba umulimo wa kushimikila. Icishinka ca kuti, Umwina Kristu onse uwaipeela alikwata ulubali lwakwe. Ifwe bonse kuti twabombako umulimo wa kushimikila mu nshila shapusanapusana. (1 Tim.1:12) Tulanonkelamo kabili tulanonsha na bambi lintu tulebombako umulimo ukufika apo twingapesha.—1 Tim. 4:16.
4 Cila umo umo kuti ayafwilishako bamunyina ba Bwina Kristu mu nshila na shimbi ishakatama. Kuti twatungilila icilonganino ukupitila mu kusangwa mu kulongana lyonse no kuba abacincimuka lintu tuleyasukapo. (Amalu. 122:1, 8, 9) Kuti twayafwilishako fye no kusungilila imibele isuma mu cilonganino. Kuti twasangwilako indalama ku mulimo wa mwi sonde lyonse, ukulingana na pantu tukwatile. Kuti twawamyako Ing’anda ya Bufumu. Bonse kuti twalundulula imibele ya kutemwa kwine kwine no kwikatana mu cilonganino ukupitila mu kwaafwa abapya, abacaice, na bakalamba kumo.—Kol. 3:12, 14.
5 Pambi kuti mwaipusha amuti: ‘Cinshi ningacita?’ Nalimo kuti mwamona imibombele yenu nge ishili kantu, lelo nga mwabombako ulubali lwenu, mulalengako ukuti icilonganino cikose, cibe icapimpa, kabili icituntulu. E ico, ifwe bonse twalikwata ulubali lwakatama mu kucindika ishina lya kwa Yehova!