Isukulu lya Butumikishi Ilya Bulesa Ilya mu 2004

¹ Yehova alapangasha abantu yawe yawe ukuti babombe umulimo wacindama mwi sonde lyonse. Inshila imo acitilamo ifi kupitila mu kukansha kwa cila mulungu mwi Sukulu lya Butumikishi Ilya Bulesa. Bushe muleisanshamo ukufika apapelele amaka yenu? Mu January, kuli ukwaluka kumo kumo ukukatendeka ku kwafwa abasambi ukunonkelamo sana mu mitantikile ye sukulu.

² Kafundisha wa Cibili: Bamunyina balanda amalyashi ya kufunda ne fishinka fikalamba ifya mu Baibolo balitasha pa mitubululo ipeelwa na kafundisha wa cibili. Ukwaba baeluda bafikapo abengi, kuti balelekanina ukubombako uyu mulimo cila mwaka. Ici kuti calenga kwaba ukwafwana; lelo icacindamisha ca kuti baeluda na babomfi batumikila bakamwenamo sana ku kubelesha kwa bakalanda bafikapo na bakasambilisha.

³ Ukutantika Ukupitulukamo kwa pa Kanwa: Nga ca kuti icilonganino cenu cili no kulongana kwa muputule mu mulungu wa kupitulukamo kwa pa kanwa, ninshi ukupitulukamo (no kutantika konse ukwa uyo mulungu) fifwile ukutwalwa ku mulungu ukonkelepo. Kabili ukutantika kwa uyo mulungu e kwa kubomfya pa kulongana kwa muputule. Lelo, nga ca kuti ukupitulukamo kuli mu mulungu wa kutandala kwa kwa kangalila wa muputule, tamulekabila ukubuula programu wa mulungu ukonkelepo onse. Lelo, ulwimbo, ukufunda pa milandile, ne fishinka fikalamba ifya mu Baibolo ifya uyo wine mulungu wa kupitulukamo e filingile ukubomfiwa. Ilyashi lya kufunda (ililandwa pa numa ya kufunda pa milandile) e lilingile ukufuma mu mulungu ukonkelepo. Ifishinka fikalamba ifya mu Baibolo fili no kukonkwapo no Kulongana kwa Mulimo ukwa maminiti 30. Uku kuti kwateululwa pa kuti kube amalyashi yatatu aya maminiti 10 nelyo yabili aya maminiti 15. (Mulingile ukufumyako ifya kubilisha.) Ukulongana kwa Mulimo kuli no kukonkwapo ne lyashi lya mulimo ilya maminiti 30 na kangalila wa muputule. Isukulu lya Butumikishi Ilya Bulesa ilya mulungu wakonkapo lilingile ukutendeka no kufunda pa milandile ne fishinka fikalamba ifya mu Baibolo ukulingana ne fyatantikwa, e lyo ukukonkwapo no kupitulukamo kwa pa kanwa.

⁴ Bomfyeni bwino ishuko limo na limo ku kukula lwa ku mupashi. Ilyo mulenonkelamo mu masambililo ye Sukulu lya Butumikishi Ilya Bulesa, mulakoselesha icilonganino, no kubombako ulubali mu kufishiwapo kwa kusesema kwa mu Baibolo. Kabili mulaleta amalumbo kuli Katendeka wa bukombe bwawamisha ubo tufwile ukubila.—Esa. 32:3, 4; Ukus. 9:19.