Abantu ba Misango Yonse Bakapusuka
1. Ni pali cinshi ukwishibikwa kwesu kuli Lesa kwashintilila?
1 Icikuuku ca bupe ica kwa Lesa calilenga abantu ukusanga inshila ya kupusukilamo. Ukufwaya kwa kwa Yehova kwa kutila “abantu ba misango yonse bakapusuke no kufika mu kwishiba bwino bwino icine.” (1 Tim. 2:3, 4) Ukwishibikwa kwesu kuli Lesa takwashintilila, pa mushobo wesu, ifyo twaishibikwa mu bwikashi, ifyo twacenjela, nelyo ifyo tumoneka kunse, lelo kwashintilila pa kukwata icitetekelo mwi lambo lya cilubula ilya kwa Yesu. (Yoh. 3:16, 36) Apo tulabombela pamo na Lesa, tufwile ukufumya impatila yonse mu mitima yesu iingatulenga ukupaata abantu abo Yehova alefwaya ukupokelela.
2, 3. Cinshi icingatwaafwa pa kutila twilapingwila abantu ku mimonekele yabo?
2 Mwilapingula: Yehova amona ifyo umuntu aba mu mutima, ukwabula akapatulula nelyo impatila. (1 Sam. 16:7) Kabili aleshiba ifyo umuntu akaba ku ntanshi. Kanshi, amona abalefwaya ukumutemuna nge fisuma. (Hag. 2:7) Bushe tumona abantu bambi nge fyo Lesa abamona?
3 Tulapapa ifyo abantu bamo abo tusanga mwi bala bamoneka. Limo imifwalile taiba iya busaka nelyo iyalinga, e lyo tababeya mwefu, limo limo kuti wamona bamo balitula no mona nelyo umulomo. Bambi nabo balulumba fye tabakwata kwa kwikala. Kwaba na ba kuti balatucusha ilyo tulebashimikila. Ukucila ukumona aba musango uyo nga bashakatale ababa bakapepa ba kwa Yehova, tufwile ukubamona nga bakaba bamunyinefwe na ba nkashi, “pantu na ifwe bene kale twali impelwa mano, ababulwe cumfwila, [kabili] abalufiwa.” (Tito 3:3) Nga twalaibukisha aya mashiwi, tukalaipamfya ukushimikila abantu bonse, nelyo fye ni balya abamoneka kwati tabalinga ukubashimikila.
4, 5. Cinshi tusambilila ku fyo Yesu na Paulo bacitile?
4 Ifya Kumwenako fya Bena Kristu Bakubalilapo: Yesu alefwailisha inshila ya kwafwilamo abantu abo bamo balemona kwati tabakabale ababa bakapepa ba kwa Yehova. (Luka 8:26-39) Nangu ca kutila Yesu talesuminisha ububi, alishibe ukutila abantu kuti balaipoosa mu mibele yabipa. (Luka 7:37, 38, 44-48) Kanshi aleumfwikisha ifyo abantu bali, “abekatilwe inkumbu, pantu bali nge mpaanga ishabula kacema.” (Marko 6:34) Na ifwe natulepashanya sana ica kumwenako ca kwe!
5 Umutumwa Paulo balimupoolele amabwe, alipuminwe no kubikwa mu cifungo. (Imil. 14:19; 16:22, 23) Bushe ifyo Paulo apitilemo fyamulengele ukuumfwa ububi no kutontonkanya ukuti alepoosa fye inshita yakwe ukushimikila inko shimo shimo ne mishobo? Nakalya. Alishibe ukutila abantu bacishinka kuti basangwa mu bantu ba mishobo yonse, kabili alikoselepo ukubafwaya. Bushe na ifwe e fyo tumona abantu tusanga mu mulimo abakwata ifikulilo fyapusanapusana ne ntambi?
6. Imibele yesu iisuma kuti yakuma shani abapya abasangwa ku kulongana?
6 Ukupokelela Abantu Bambi Pali Lelo: Ababomfi ba kwa Lesa abengi baliba ne nsansa pa fyo babapokelele mu cilonganino kuli bamunyinefwe na bankashi abashilolesha pa mimonekele ya muntu. Umwaume umo uwatekele umwefu no mushishi uutali uwalefika pa mabeya, uwafwele ifya kufwala fyalamba, aile ku Ng’anda ya Bufumu ku Germany. Aishibikwe ngo muntu umubi. Lelo ilyo aile mu kulongana balimupokelele bwino. Alitemenwe sana ica kutila umulungu wakonkelepo alile ku kulongana na kabili. Tapakokwele, atendeke ukufwala bwino, alekele ukupeepa fwaka, kabili alilembeshe ne cupo cakwe mwi funde. Tapapitile inshita ntali, uyu mwaume, abakashi na bana bakwe bonse batendeke ukubombela Yehova mu kwikatana.
7. Kuti twapashanya shani Lesa wesu uushaba na kapaatulula?
7 Ilyo tulepashanya Lesa wesu uushaba na kapaatulula, shi natwite abantu abengi pa kuti na bo bakanonkelemo mu icikuuku ca bupe ica kwa Lesa.
[Amashiwi pe bula 3]
“Lesa taba na kapaatulula, lelo mu luko lonse umuntu uumutiina no kubomba ubulungami alapokelelwa kuli wene.”—Imil. 10:34, 35.