Muleya Bwangu ku Balefwaya Ukusambilila
Ukutula apo Webu saiti iipya yapangilwa, impendwa ya bantu abepusha ukuti balefwaya ukusambilila Baibolo naikulilako sana. Cimbi icilengele ukuti abalefwaya ukusambilila bafulileko, ni nshila ipya iyo tulebomfya mu kushimikila ku cintubwingi. Aba ku musambo tabakokola ukulemba no kutuma amashina ya balefwaya ukusambilila nga bayapokelela fye. Ku ca kumwenako, umuntu nga atuma pa jw.org, ukuti alefwaya ukusambilila, ilingi line papita fye inshiku shibili ukutula apo umuntu alembeele ninshi iofeshi lya musambo lyatumina baeluda aba kuli iyo ncende ishina lya uyo muntu. Lelo calyumfwika ukuti, limo palapita imilungu iingi pa kuti abaipwishe ukuti balefwaya ukusambilila Baibolo batandalilwe. Kuti twacita shani pa kuti twingafwa umuntu ilyo talafumyako amano ku kufwaya ukusambilila?—Marko 4:14, 15.
Nga ca kuti umuntu uulefwaya ukusambilila tekala mu ncende yenu, ilyo line mulingile ukulemba formu ya kuti, Mukwai Fwayeni Uyu Muntu (S-43) kabili mulingile ukupeela kalemba ilyo mukaya mu kulongana kukakonkapo. Kalemba na o alingile ukutuma ifi fyebo mu bushiku bumo fye nangu shibili, alingile ukubomfya webu saiti ya jw.org. Ifilonganino ifishilatampa ukubomfya jw.org filingile ukukonka ifyaba ku numa ya formu ya (S-43). Baeluda ababomfya Webu saiti yesu balingile ukulamonapo libili libili. Nga bapokelela fye ifyebo ukuti kuli umuntu uulefwaya ukusambilila, balingile ukweba aba kuya mumona mu kwangufyanya. Kasabankanya onse uo baeba ukuyamona uyo muntu talingile ukushingilisha, alingile ukuyako ilyo line. Nga mwasanga ukuti uyo muntu talipo, nalimo kuti mwasha mwalemba utufyebo mwabikapo na adresi yenu.