Finshi Tubika pa Webusaiti Yesu?

Yesu Kristu aebele abasambi bakwe ati: “Lekeni ulubuuto lwenu lubalikile ku bantu, pa kuti bamone imilimo yenu iisuma no kucindika Shinwe uwaba mu muulu.” (Mateo 5:16) Pa kucite co, tulabomfya ifya kupangapanga ifya muno nshiku ukubikako fye na Intaneti. Tulabika ifyebo pa Intaneti, pa webusaiti yesu iya jw.org ifilanda pa fyo fwe Nte sha kwa Yehova twasuminamo elyo na pa milimo yesu. Fyebo nshi fimbi ifibapo?

Palaba ifyasuko fya mu Baibolo ku fipusho abantu bepusha sana. Pa Webusaiti yesu mukasangapo ne fyasuko ku fipusho fyacindama ifyo abantu bepusha. Pali ifi, paliba ne fipusho 6 ifyo trakiti iitila, Bushe Ukucula Kukatala Akupwa? e lya ne iitila Bushe Cine Cine Abafwa Kuti Baba aba Mweo na Kabili? ayaba pa Intaneti mu ndimi ukucila pali 600 yayasuka. Paliba na Baibolo ya Amalembo ya Calo Cipya mu ndimi ukucila pali 130 e lyo ne fitabo fimbi ifingamwafwa ukusambilila Baibolo, pamo nga icitabo ca Bushe Cinshi Baibolo Isambilisha? e lyo na Ulupungu lwa kwa Kalinda na Loleni! ifya nomba line. Kuti mwabelenga nelyo kuti mwakopolola ifyebo fya kukutikako mu musango wa MP3 kabili kuti mwakopolola ne fyebo fya kubelenga mu musango wa PDF, nelyo mu musango wa EPUB. Nga mulefwaya kuti mwapulintilako na bambi abengatemwa ifyo fyebo mu citundu baishiba! Palaba ne mpapulo mu fitundu ifingi ifya bankomamatwi isha pa vidio. Kuti mwakopa ne nyimbo ishisuma isho mwingalakutikako e lyo na mashiwi ya mu Baibolo ayo babelenga bwino sana kwati baleshimika fye ifyalecitika.

Palaba ilyashi lya Nte sha kwa Yehova. Mukasangapo ilyashi no tu mavidio utwipi umo balanga no kulondolola ifyo tulebomba umulimo wesu mwi sonde lyonse, ne fintu fimbi ifilecitikila Inte sha kwa Yehova e lyo ne fyo twafwilisha abaponenwa utuyofi. Balabikapo ne nshiku kukaba ukulongana kwa citungu ne fifulo kukabelapo e lyo na ma-adresi ya maofeshi ya musambo.

Ukubika ifyebo pa Intaneti kulalenga tuleafwa abantu mu fyalo fyalekanalekana ukwishiba icine. Na kuba, ifi fyebo fileafwa abantu mu fyalo ifingi sana kumo ne fyalo ifyaba ukutali pamo nga ku Antarctica, ukwatalalisha. Tulapepa ukuti ‘icebo ca kwa Yehova cilesalangana bwangu bwangu’ pano calo ponse, pa kuti abantu balecindika Lesa.—2 Abena Tesalonika 3:1.

• Bushe ifyebo tubika pa Webusaiti ya www.jw.org fyafwa shani abantu abengi ukusambilila Baibolo?

• Fyebo nshi mwingatemwa ukwishiba pa fyo tubika pa webusaiti yesu?