ISAMBILILO 1

Intendekelo Iisuma

Imilimo 17:22

IFILI MULI ILI ISAMBILILO: Intendekelo ilingile yalenga abalekutika batemwa ifyo mwalalanda, baishiba ico mwalalandapo, baishiba no kuti ifyo mwalalandapo kuti fyabafwa.

IFYO MUFWILE UKUCITA:

Mulelenga abalekutika batemwa ifyo mwalalanda. Saleni icipusho, landeni pali fimo ifyo abantu bengatemwa ukukutika, landeni pa fyacitike, nelyo pa fyo mwaumfwile pa mulabasa, nelyo ifyo mwabelengele mu nyunshipepala ifyo abalekutika bengatemwa ukumfwa.

Muletontonkanishisha libela ifyo abaleya mu kukutika kuli imwe bengatemwa ukumfwa ne fingabasakamika, lyena pekanyeni intendekelo iilingene ne fyo fine.
Mulelenga baishiba ico mwalalandapo. Intendekelo yenu ifwile yalenga abalekutika baishiba ifyo mwalalandapo ne co mwalafilandila.
Mulelenga baishiba ukuti ifyo mwalalandapo kuti fyabafwa. Mulelanda ifingafwa abalekutika ukulingana ne fyo balekabila. Abalekutika balingile bamona ukuti ifyo mulelandapo kuti fyabafwa.

Ilyo mulepekanya ilyashi, muleyipusha amuti, ‘Mafya nshi bamunyinefwe na bankashi mu cilonganino bakwete?’ Lyena pekanyeni intendekelo iilingene ne fyo balekabila.