Ifikuulwa Bapwishishe Ukukuula Ilyo Icikuko ca COVID 19 Tacilatendeka

Ifi abantu abengi balebatishiwa cila mwaka, tulekabila ifikuulwa ifingi ifya kubomfya mu kupepa Yehova. Pa kuti tukwate ifikuulwa ifingi, Amadipartimenti ya Makuule aya Local Design/Construction mwi sonde lyonse yalipekenye ukukuula nelyo ukuwamya ifikuulwa fya kupepelapo, ukucila 2,700 mu mwaka wa mulimo uwa 2020.a

Ku ca bulanda ifi bapangile tafyacitike pa mulandu ne cikuko ca COVID-19. Apo Komiti ya Kusabankanya iye Bumba Litungulula yalefwaya ukucingilila bamunyinefwe na bankashi, kabili na pa mulandu na mafunde ayo ubutekeko bwabikileko, yatile amakuule ayengi mwi sonde lyonse yabale yeminine. Na lyo line, mu mwaka wa mulimo uwa 2020, ilyo icikuko tacilatendeka, balikuule ifikulwa fya kupepelapo e lyo fimbi baliwamishe. Ifi ifikulwa fyalicilile pali 1,700. Na kabili, balipwishishe imilimo ya makuule iikalamba pa maofeshi ya musambo ukucila pali 100. Moneni ifyo aba bwananyina banonkelemo mu makuule yabili ayakalamba ayo bapwishishe ilyo icikuko tacilatendeka.

Umusambo wa ku Cameroon. Iofeshi lya musambo ilyabelele mu musumba wa Douala lyalicepele sana kabili lyalekabila ukulikusha. Komiti ya Kusabankanya yamwene ukutila kuti cawama ukukusha umusambo no ku-uwamyako, nomba indalama bali no kubomfya pa kukusha umusambo shali no kufula ukucila mu cipimo. Balifwaishilishe ne ndalama bali no kubomfya nga ca kuti bakuula umusambo uupya nelyo nga bashita icikuulwa cimbi e lyo baciwamya, nomba na fyo fine tafyabombele.

Lyena bamunyinefwe baishileishiba ukuti ku kapinda ka ku kuso aka Douala, ubuteko bulepanga ukuwamya umusebo uwapita ukwabela Icikuulwa ca Kulonganinamo Ukulongana Kukalamba. Uyu umusebo wali no kulenga cileanguka ukuya pa cikuulwa kabili wali no kulenga ca-anguka ukutwalapo amalaiti, amenshi e lyo ne fintu fimbi ifyalekabilwa. Ifi fine e fyalekabilwa pa kukuula umusambo uupya. Kanshi Ibumba Litungulula lyalisuminisheko ukuti bakuule umusambo pa ncende apaba ne Cikuulwa ca Kulonganinamo Ukulongana Kukalamba.

Ba Nte e lyo na ba ku kampani ako bapeele umulimo wa kukuula balebombela pamo, ici calengele bapwishe bwangu ukukuula kabili tabapooselepo indalama ishingi. Na kuba, indalama babomfeshe shalicepele ica kuti tashafikile na kundalamba bale-enekela ukubomfya. Indalama shashelepo shalicilile pali 43 milion kwacha! Ulupwa lwa pa Bethel lwalikukiile pa Bethel iipya ilyo fye icikuko ca COVID-19 cishilatendeka.

Pali ino nshita ababombela pa Bethel ku Cameroon baleikala bwino kabili balebomba bwino sana. Na kabili, bamona uyu umusambo uupya ukuti bupe ukufuma kuli Yehova. Abaupana bamo batile, “Tulefwaya ukulabombesha no kulalanga ukuti tulatasha pali ubu bupe.”

Amaofeshi ya Bakapilibula (RTO) ku Mexico apo bapilibwila iciTojolabal. Pa myaka iingi, ababwananyina abapilibula ululimi lwa ciTojolabal balebombela pe ofeshi lya musambo ilya ku Central America ilyaba mupepi no musumba wa Mexico City. Nomba ululimi lwa ciTojolabal balulanda sana ku citungu ca Altamirano ne ca Las Margaritas apalepa amakilomita nalimo 1,000 ukufuma apabela iofeshi lya musambo! Ici calengele bakapilibula belaishiba amashiwi yamo ayo abantu baleka ukubomfya na yo ba-alula. Kabili caleshupa ukusanga aba bwananyina abakupilibula ciTojolabal na bakubomfya mu mavidio ne fya kukutikako.

Ici calengele Komiti ya Kulemba iye Bumba Litungulula isalepo ukutwala amaofeshi ya bakapilibula ku ncende uko balanda sana iciTojolabal. Pa kuti bacite ifi, iofeshi lya musambo lyapingwilepo ukushita icikuulwa kuli iyi ncende no kuciwamyako. Ukucita ifi kwalengele bebomfya indalama ishingi, pantu ukukuula nelyo ukusonkela amaofeshi ya bakapilibula kwali no kulenga bapoosa indalama ishingi.

Uwa bwananyina umo uupilibula iciTojolabal alilandile ubusuma bwafuma muli ifi babombela uko balanda ulu ululimi. Atile: “Pa myaka 10 iyo nabomba umulimo wa kupilibula pa musambo, nshatalilesangapo ulupwa abalanda ululimi lwandi mupepi no musambo. Nomba pali ino nshita amaofeshi yesu yaba kulya kwine balanda sana iciTojolabal. Cila bushiku ndalanda na bantu abalanda iciTojolabal. Ici calilenga naishibilako amashiwi na yambi aya muli ulu lulimi kabili calilenga nalabomba bwino sana umulimo wandi.”

Amakuule balekabila ukubombelapo mu Mwaka wa Mulimo uwa 2021

Ukulingana ne fyo ifintu fyalaba mu mwaka wa mulimo uwa 2021, bamunyinefwe balepanga ukubombela pa makuule 75 apali amaofeshi ya bakapilibula, e lyo ne fikuulwa apakulabela amasukulu ya bulesa. Na kabili, amakuule ayakalamba aya maofeshi ya misambo 8 yaletwalilila, ukubikako na makuule ya maofeshi yakalamba ayapya ku Ramapo, ku New York, e lyo no kukuusha amaofeshi ya musambo wa Argentina na ya ku Italy. Na kabili, Amayanda ya Bufumu ayapya ayali 1,000 nayo yalekabilwa ukukuulwa, kabili ifikuulwa fya kulonganinapo ifili 6,000 tafyaba bwino kabili filekabila ukupyanikapo fimbi. Kuli na Amayanda ya Bufumu 4,000 ayelekabila ukuyawamya.

Ni kwi kufuma indalama tubomfya pa kukuula no kuwamya ifi fikuulwa? Munyinefwe Lázaro González uwaba mu Komiti ya Musambo wa Central America alyaswike ici cipusho ilyo alelanda pa makuule ya Maofeshi ya Bakapilibula apo bapilibwila iciTojolabal. Atile, “Mu cifulo iofeshi lyesu ilya musambo lyangalila bamunyinefwe abengi bapiina. Kanshi ukwabula ukwafwa kwa bamunyinfwe mwi sonde lyonse te kuti tukumanishe ukukuula amaofeshi ya bakapilibula apa kupilibwila indimi isho aba bwananyina kuno balanda. Indalama isho aba bwananyina mwi sonde lyonse basangula nashilenga tulekuula amaofeshi ya bakapilibula mu ncende umo balanda sana ululimi balepilibula. Tuletasha aba bwananyina mwi sonde lyonse pali bukapekape bwabo.” Ca cine ukuti indalama isho musangwilako ku mulimo wa mwi sonde shilalenga tulebomba iyi milimo ya makuule, kabili tulapokelela indalama ishingi isho mutuma ukubomfya donate.jw.org.