Bushe Lesa Kuti Angafwa Nga Napepa?

Ifyo Baibolo ilanda

Ee, Lesa alafwa abamulomba ifintu ukulingana no kufwaya kwakwe mu bufumacumi. Nangu ca kuti tamwatala amupepapo, ifya kumwenako fyaba mu Baibolo ifya bantu abapepele kuli Lesa ati “Mwe Lesa ngafweni,” kuti fya mwafwa. Ku ca kumwenako:

• “Njafweni, mwe Yehova Lesa wandi; Mpususheni ukulingana ne cikuuku cenu.”—Amalumbo 109:26.

• “Ndi ncushi kabili ndi mupiina: Njafweni mwe Lesa.”—Amalumbo 69:6, ukulingana na Baibolo ya Douay Version.

Ca cine ukuti uwalembele yalya mashiwi aali ne citetekelo cakosa muli Lesa. Na lyo line, Lesa alasuka bonse abamupepa mu bufumacumi, pamo nga abantu ababa ne “mitima ya bulanda” nelyo “abasakamikwa imitima.”—Amalumbo 34:18.

Tamulingile ukutiina ukuti Lesa ali-italusha ku bantu ica kuti tasakamana na mafya bakwata. Baibolo itila: “Yehova alisumbuka, lelo alamona abaiceefya; Kabili aba ukutali na baitutumuna.” (Amalumbo 138:6) Na kuba inshita imo Yesu aebele abasambi bakwe ati: “Ne mishishi ya ku mitwe yenu yonse yalipendwa.” (Mateo 10:30) Lesa alishiba ifintu ifingi pali imwe ifyo na imwe mwe bene mushaishiba. Kanshi ukwabula ukutwishika, akakutika nga mwapepa ukuti amwafwe ku masakamika mukwete!—1 Petro 5:7.