Ukulenga Impanga Yakuba Ukufunda
KU ULEMBA LOLENI! MU INDIA
Bushe ni shani fintu impanga yakuba iya mu Ladakh, icitungu cabela ku kapinda ka ku kuso aka India, ingalengwa ukufunda sana? Ici e cipusho Tsewang Norphel uwalebomba incito ya bukakuula aletontonkanyapo. Amenshi yatendeka ukukonkoloka ukufuma ku menshi makasa ayaba mu Mpili sha Himalaya mu mweshi wa June, te mu April ilyo imfula ishiloka sana kabili ilyo bashibulimi bakabila amenshi ya kutapilila amabala yabo. Norphel apangileko icintu cimo icamwafwile ukupwisha bulya bwafya: Apangile apa kwikalila amenshi makasa apashika sana, apo yengatendekela ukusunguluka ku kutendeka kwa mwaka.
Ukulingana na magazini ya ku India iya The Week, Norphel na bo alebomba nabo bayalwile amenshi ukufuma mu kamana ka mu lupili ukuyatwala mu mukolwa wapangwa na bantu uwalepa amamita 200 kabili uwakwata umufumina amenshi 70. Amenshi yakonkoloka panono panono ukukonka mu lupili kabili yasanguka amenshi makasa ilyo yashilafika ku fibumba fyakuulwa pa mutentemuko ku kucilikila amenshi. Amenshi makasa yaya yalefula yasuka yafimba ne fibumba. Apo ulupili lulacinga amenshi makasa, yasunguluka fye mu April ilyo kwakaba, icilenga na menshi ya kutapilila ifilimwa ayakabilwa sana pali ilya nshita ukufula.
Bushe abalefwaisha ukupanga apa kwikalila amenshi makasa balitungulwike? Ifyo Norphel aletontonkanya fyalibombele bwino ica kuti balipangile apa kwikalila amenshi makasa apaba ifyo fine 10 mu Ladakh, kabili balefwaya ukukuulilapo na pambi. Ifibumba fimo ifya kwikalilapo amenshi makasa, ifyakuulwa ukufika apalepa amamita 1,300, kuti fyasunga amenshi nalimo amalita amamilioni 34. Bushe ni ndalama shinga shingapooswa pa kukuula? Magazini ya The Week yatile: “Ukukuula apa kwikalila amenshi makasa kuti kwasenda nalimo imyeshi ibili kabili indalama shipooswapo madola ya ku America 1,860, ishingi pali ishi ndalama shibomfiwa ku kulipila ababomfi.”
Ukulamuka kwa bantunse nga kwabomfiwa bwino kuti kwaleta ifisuma. Tontonkanyeni pa fyo abantu bakaba na maka ya kucita ilyo bakalatungululwa no Bufumu bwa mu muulu ubwa kwa Lesa! Baibolo ilaya aiti: “Fisekelele amatololo ne mpanga iyaumisha, ifiswebebe fyange no kupuuka nga cananika, . . . mu matololo e mwalepuka mwatula amenshi, ne milonga yafuma mu fiswebebe.” (Esaya 35:1, 6) Mwandi tukaba ne nsansa ilyo tukabombako pa kuwamya isonde!
[Abatusuminishe Ukubomfya Icikope pe bula 31]
Mountain High Maps® Copyright © 1997 Digital Wisdom, Inc.
Arvind Jain, The Week Magazine