Nalefwaya Sana kufikilisha ico Napangile Ukucita

NGA FINTU CASHIMIKWA NA BA MARTHA CHAVEZ SERNA

Bushiku bumo ilyo nali ne myaka 16, naliponene no kufwe icipuupu ilyo nalebomba pa ng’anda. Ilyo nabuukile, nasangile ndi pa busanshi. Nshaishibe icalecitika, kabili umutwe walikalipe sana, palipitileko inshita pa kuti ntendeke ukumona no kumfwa ifilelandwa. Nalitiinine. Cinshi cancitikile?

ABAFYASHI bandi abasakamene sana, bantwele ku kumonana na dokota, uwanembeele umuti wa mavitamini. Atile, icalengele mpone ni co nshalelaala bwangu. Ilyo papitile imyeshi inono, na kabili naliponene no kufwe cipuupu, e lyo no muku wa butatu. Twailemona dokota umbi, uwatile ubwafya bwali ku mishipa yandi, kabili ampeele umuti wa kungafwa ukulaala.

Lelo, natwalilile fye ukulapona. Nalepona ilingi, nafwa icipuupu no kuicena. Limo limo naleisumaula ululimi na mu kanwa. Nga nabuuka, umutwe walekalipa sana kabili naleumfwa umuselu. Umubili onse walekalipa, kabili ilingi nshaleibukisha ifyalecitika ilyo nali mupepi fye no kupona. Pa kuti mbe bwino nalekabila ubushiku bumo nelyo shibili isha kutuusha ukwabula ukwima. Nangu nalelwale fyo, mu mutima naleti awe nkapola—nkaba fye bwino.

Ifyacitike ku co Napangile Ukucita

Ilyo nali fye umwaice, ulupwa lwandi lwatendeke ukusambilila Baibolo ne Nte sha kwa Yehova. Abaletusambilisha bali bapainiya baibela babili, ababomfi ba nshita yonse abapoosa amaawala ayengi cila mweshi ukusambilisha abantu icine ca mu Baibolo. Nalimwene ukuti umulimo bapainiya balebomba walebaletele nsansa. Na ine natendeke ukumfwa bwino nga ndelanshanya na bakafundisha e lyo na bana be sukulu banandi pa malayo ya mu Baibolo.

Mu nshita fye inono abengi mu lupwa lwesu baishileba Inte sha kwa Yehova. Ala naleumfwa bwino ukubila imbila nsuma! Ilyo nali ne myaka 7, napangile ukuti mpaka na ine nkabe painiya waibela. Ilyo nali ne myaka 16, nalibatishiwe, kabili ulubatisho lwali no kungafwa sana ukufikilisha ico napangile ukucita. Iyi ine nshita, e lyo natendeke no kupona no kufwe cipuupu.

Umulimo wa Bupainiya

Nangu nalelwala, nalefwaya sana ukuba Inte ya kwa Yehova iibomba umulimo wa nshita yonse. Nomba apo mu milungu imo naleponamo ne miku ibili, bamo mu cilonganino batile te kuti ciwame ukutendeka uyu mulimo wakulisha. Nalyumfwile ububi kabili nalifuupwilwe. Lelo, twaishiletendeka ukulongana icilonganino cimo na baupana babili abalebombela pa maofesi ya Nte sha kwa Yehova mu Mexico. Ilyo baumfwile ukuti ndafwaya ukuba painiya balinkoseleshe sana. Banjebele ukuti ukulwala takufwile ukundesha ukuba painiya.

E ico, pa 1 September, 1988, nasontelwe ukuba painiya wa nshita yonse ku mwesu kwine mwi tauni lya San Andres Chiautla, mu Mexico. Cila mweshi nalepoosa amaawala ayengi ukubila imbila nsuma. Nga nafilwa ukwima ukuya mu kushimikila pa mulandu wa kulwala, nalelemba fye amakalata ku bantu abaleikala mupepi na ku mwesu kabili muli bakalata nalebeba ifya mu Malembo e lyo no kubakoselesha ukusambilila Baibolo.

Ubulwele Bwandi Bwaishibikwa

Pali iyi nshita abafyashi bandi balipoosele indalama ishingi sana no kuntwala kuli dokota wa mishipa. Uyu dokota asangile ukuti ico nalelwala, nicipumputu. Umuti alempeela walingafwile sana ica kuti nshalepona pa myaka 4. Muli iyo nshita e lyo nasangilwe kwi Sukulu lya Bupainiya ilyalengele nkoseleshiwe ukuyabombela uko bakabila ba mbila nsuma balefwaikwa sana.

Abafyashi bandi balishibe ukuti nalefwaya sana ukubombesha. Apo nomba nshalelwalilila, balinsuminishe ukuya kwi tauni lya Zitácuaro, ku citungu ca Michoacán State apali amakilomita 200 ukufuma ku mwesu. Ukuba na bapainiya bambi ilyo nalebombela uku kwalingafwile ukutemwa sana umulimo wa nshita yonse.

Lelo, pa numa ya kwikala imyaka ibili mu Zitácuaro, natendeke ukupona na kabili. Nabwelele ku ng’anda ku bafyashi bandi, ninshi nshili bwino, nimfuupulwa kabili ndi no bulanda. Naile kuli dokota wa mishipa uwatile umuti nalebomfya walengonaula ilibu. Natendeke ukufwaya umuti umbi, pantu nomba caleafya ukusanga indalama sha kulipila badokota balya aba pa muulu. Ubulwele bwandi bwaleilako fye pa ntanshi, e ico nalekele bupainiya. Lyonse nga napona nalelwalisha. Lelo, nga nabelenga Amalumbo no kupepa kuli Yehova, nalemona ifyo alensansamusha no kunkosha.—Amalumbo 94:17-19.

Nafikilisha Ico Napangile Ukucita

Ilyo ubulwele bwandi bwabipile sana, nalepona imiku ibili mu bushiku bumo. Lyene ifintu fyaishileba bwino ilyo dokota atendeke ukumpeela umuti ulya wine uwa bulwele bwa cipumputu, kabili naleikala ukwabula ukupona pa nshita iitali. E ico, pa 1 September, 1995, natendeke bupainiya na kabili. Naishileba fye bwino, ica kuti pa numa ya kubomba imyaka ibili ukwabula ukuponapo, nalombele bupainiya bwaibela. Muli uyu mulimo nali no kulabomba inshita iikalamba e lyo no kuya fye mu kubomba konse uko balefwaya sana aba kubile mbila nsuma. Ala nalitemenwe ilyo nasontelwe ukuba painiya waibela! Nomba nali no kutendeka umulimo napangile ukubomba ilyo nali fye umwaice.

Pa April 1, 2001, natendeke umulimo wandi uupya mu mushi waba mu mpili mu citungu ca Hildalgo State. Pali nomba mombela mwi tauni linono ilyaba mu citungu ca Guanajuato State. Mfwile ukubikako sana amano ku kunwa umuti e lyo no kutuusha sana. Ndasala ifya kulya. Nshilya ifya mafuta, ifyabamo kafeni pamo nga kofi, ne fya mu cikopo. Kabili ndesha sana ukukanafulwa no kukanasakamikwa sana. Lelo, ifi nalandapo fyalingafwa sana. Ukutula apo nabela painiya waibela, naponapo fye umuku umo.

Apo ndi mushimbe e lyo nshakwata no lupwa lwa kusakamana, ndafwaya sana ukutwalilila ukuba painiya waibela. Ndomfwa bwino ukwishiba ukuti ‘Yehova tali uushalungama uwa kuti alabe umulimo wesu no kutemwa uko tulanga kwi shina lyakwe.’ Wena ni Lesa wakwata ukutemwa, pantu tatweba ukumupeela ifyo tushingamupeela! Ukwishiba ico cishinka kwalingafwa ukucita ifyo ningakumanisha ukucita, pantu nga ca kutila ukulwala kwalenga naleka bupainiya na kabili, nkeshiba ukuti Yehova akasekelela na pa fyo nakulamubombela ukufuma pa nshi ya mutima.—AbaHebere 6:10; Abena Kolose 3:23.

Ala mwandini ukulanshanya na bantu pa citetekelo candi cila bushiku kulankosha. Cilenga lyonse ndetontonkanyapo pa fyo Lesa akatupaala ku ntanshi uku tuleya. Baibolo itila mu calo cipya, tamwakabe ukulwala, “nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.”—Ukusokolola 21:3, 4; Esaya 33:24; 2 Petro 3:13.

[Ifikope pe bula 24]

Pa muulu: Ilyo nali ne myaka 7; na lintu nali ne myaka 16, pa numa fye ya kubatishiwa

[Icikope pe bula 25]

Ndeshimikila no munandi