Kusheni Bwino Abana Benu

UULEMBA LOLENI! MU CANADA

◼ Magazini ya The New York Times yatile: “Pa TV kuti twasambililapo ifintu.” Lelo, “ukutamba TV pa nshita iikalamba kuleonaula imibili ya baice na matontonkanyo yabo,” kuleliila abaice inshita bengabomfya ukusambililamo imilimo imo e lyo ne nshita ya kwampana na bantu bambi.

Kwali abafwailishe pa fyo abaice 2,500 batamba TV. Aba bantu bafumine pa cipatala ca baice ica mu Seattle, ku Washington, mu America, kabili “basangile ukuti abana abali no mwaka umo ukushinta ku bali ne myaka itatu abatamba sana TV, nga bafisha imyaka 7, balafilwa ukubika sana amano” ku fintu. Aba bana bali no bukali mu kukula kwabo kabili tabaletekanya mu kucita ifintu e lyo cimbi ca kuti tabalebika amano ku fintu pa nshita yalepa. Ba Jane M. Healy, badokota abasambilila ifyo abantu basambilila, batile “abafyashi abengi abakwete abana abali no bwafya bwa kubika amano ku fintu basangile ukuti abana babo batendeke ukubako bwino ilyo batampile ukubalesha ukutamba sana TV.”

Finshi abafyashi bengacita pa kuti abana babo belatamba sana TV? Lilya lyashi lyali muli magazini tulandilepo pa muulu lyatile: Abafyashi balingile ukutantika inshita abana babo bakulatamba TV e lyo ne nshita bakulapoosa cila bushiku. Tabalingile ukubomfya TV kwati e ca kusembelekelako abana pa kuti tababapumfyenye mu tumilimo balefwaya ukubombako. Lelo, abafyashi balingile ukuleka abana babo nabo balebombako imilimo pa ng’anda. Mwe bafyashi, saleni amaprogramu ya pa TV ayo umwana wenu engatambako, kabili shimyeni TV nga ca kutila amaprogramu mwasala yapwa. Nga kuti mwakumanisha, beni pamo no mwana wenu pa kutamba amaprogramu mwasala kabili mulelanda na pa fyo muletamba. Ica kulekelesha, na imwe bene mwilatamba sana TV.

Pa kuti abana basambilile imilimo e lyo ne fyo bafwile ukula-ampana na bantu bambi cilasenda inshita. Kanshi mufwile ukukosapo no kuisalapula. Nga mwabombesha, abana benu kuti bakula bwino. Ifi fine e filanda ne pinda lya kale ilitila: “Sambilisha umwaice umo afwile ukubela; ne lyo akakota takafumemo.” (Amapinda 22:6) Abafyashi balingile ukusambilisha abana babo maka maka imibele isuma.

Inte sha kwa Yehova babomfya icitabo cabo ica kuti Sambilila Kuli Kasambilisha Mukalamba pa kusambilisha abana babo imibele isuma. Kanshi, abafyashi nga balelanshanya bwino na bana babo kabili balebabikako amano ilyo bali fye abaice, bakakula bwino. Abana nga bakula bwino, abafyashi kuti baba ne nsansa nga nshi.