Ifya Kulomba Ubwelelo

UBWAFYA UBUBAPO

Tutile e lyo mwacifuma fye mu kuumana na bena mwenu, e lyo mwalatontonkanya amuti ‘Nshifwile ukulomba ubwelelo pantu te ine nacilufyanya.’

Nangu ca kuti namuleka ukuumana, mushele namufulwa. Mwatontonkanya ukuti mulingile ukulomba ubwelelo, lelo mwafilwa ukweba abena mwenu ukuti, “Njeleleniko.”

ICILENGA ABAUPANA BAMO BALEFILWA UKULOMBA UBWELELO

Icilumba. Ba Charles,a batile: “Apo limo ndaba ne cilumba, cilangafya ukweba umwina mwandi ukuti ‘uunjeleleko.’ Ukuba sana ne cilumba kuti kwalenga umuntu afilwa ukusumina ukuti nalufyanya.

Ifyo mutontonkanya pa kulomba ubwelelo. Nalimo kuti mwalamona ukuti mulingile fye ukulomba ubwelelo nga ca kuti ni mwe mulufyenye. Ba Jill, abaupwa batile: “Nga ninshininkisha ukuti nine ndufyenye, tacafya ukulomba ubwelelo, lelo cilangafya ukulomba ubwelelo nga ca kuti bonse babili twacilanda amashiwi ayabipa. Cinshi ningalombela ubwelelo nga ca kuti bonse babili natulufyanya?”

Nga namushininkisha ukuti abena mwenu e bacilufyanya, nalimo kuti mwamona ukuti tamulingile ukulomba ubwelelo. Ba Joseph batile: “Nga naushininkisha ukuti te iwe ulufyenye, taufwile ukulomba ubwelelo pantu umwina mobe kuti amona kwati naulufyanya.”

Inkulilo yenu. Nalimo mwakuliile mu lupwa umo abantu bashalelomba sana ubwelelo. Nga mwakuliile mu lupwa lwa ifi, kuti calamwafya ukulomba ubwelelo pantu ninshi ilyo mwali abaice, tamwabeleshe ukulomba ubwelelo.

IFYO MWINGACITA

Muletontonkanya pa bena mwenu. Muletontonkanya pa fyo mwaumfwile ilyo umuntu umo amulombele ukuti mumweleleko. Bushe te kuti mutemwe ukucita cimo cine ku bena mwenu? Nangu ca kuti namushininkisha ukuti te imwe mulufyenye, kuti mwalomba ubwelelo pa fyo mwacicita mu kukanaishiba ifyacikalifya abena mwenu. Ukulomba ubwelelo kuti kwalenga abena mwenu banashako ubukali.—Ilembo ilingamwafwa: Luka 6:31.

Muletontonkanya pa cupo cenu. Mwilamona kwati nga mwalomba ubwelelo ninshi ni mwe mulufyenye, lelo ukucita ifi kulalenga icupo cenu ukukosa. Na kuba, pa Amapinda 18:19 patila uo babembukila “acila umusumba wakosa.” Cilafya ukutendeka ukumfwana na bena mwenu nga ca kuti bonse babili tamulefwaya ukulomba ubwelelo. Lelo, nga mwalomba ubwelelo, ninshi mukatwalilila ukulaumfwana kabili ninshi mukalakosha icupo cenu.—Ilembo Ilingamwafwa: Abena Filipi 2:3.

Mulelomba bwangu ubwelelo. Cilafya ukulomba ubwelelo nga mulemona ukuti bonse babili namulufyanya. Na lyo line, ifilubo ifyo abena mwenu bacita, tafilingile fyalenga na imwe ukulacita ifyabipa. Kanshi mulelomba bwangu ubwelelo, kabili mwilatontonkanya ukuti nalimo nga papita inshita, abena mwenu bakalabako ku cilubo mucitile. Nga mwalomba ubwelelo, abena mwenu nabo kuti cabangukila ukulomba ubwelelo. Nga mwabelesha ukulomba ubwelelo, ninshi tacakulamwafya ukulomba ubwelelo nga mwalufyanya.—Ilembo Ilingamwafwa: Mateo 5:25.

Mulingile ukulomba ubwelelo ukufuma pa nshi ya mutima. Nga muleipokolola pa fyo mucitile, ninshi tamulelomba ubwelelo. Ukulanda amashiwi ya mitumfyo pamo nga, “Unjeleleko nangu ca kuti ulafulwa fye bwangu,” te kulomba ubwelelo iyo! Nampo nga mulemona ukuti abena mwenu bacilinga ukufulwa nelyo iyo, mulingile ukusumina ukuti namulufyanya no kuti namubakalifya.

Mulesumina ukuti namulufyanya. Mulesumina ukuti mulalufyanya pantu na kuba bonse tulalufyanya. Nangu ca kuti mulemona kwati te imwe mulufyenye, ifyo imwe muletontonkanya kuti fyapusana ne fyo bambi bengatontonkanya. Baibolo itila: “Uwabalilapo ukulubulula amoneka umulungami; lelo umunankwe aisa no kumulengulula.” (Amapinda 18:17) Nga mulesumina ukuti na imwe bene mulalufyanya, ca kulalenga mulelomba ubwelelo.