AKABOKOSHI KAKUTWAFWA UKUSAMBILILA 10C
Kuti Alenga Twaiminina Na Kabili
KUTI twaba na maka nga twatontonkanya pa fyo tusambilila ku cimonwa caba pali Esekiele 37:1-14. Ifyo tusambilila kuli ici cimonwa kuti twafibomfya ilyo tuli na mafya. Finshi ifyo fine tusambililako?
Inshita shimo kuti twasakamana sana nga twakwata amafya nangu amesho, ica kutila kuti twanaka twafilwa no kutwalilila ukushipikisha. Na lyo line, ilyo tuli na mafya kuti twaba na maka nga twatontonkanya sana pa fyo balondolola icimonwa Esekiele amwene icilanda pa kulenga ifintu fyaba nge fyo fyali pa kubala. Cinshi twalandila ifi? Kuli ici cimonwa kuti twasambililako ukuti, nga ca kuti Lesa alikwata amaka ya kulenga amafupa yaba no mweo, ninshi kuti atupeela amaka ya kushipikisha amafya, ukubikako fye na mafya ayakalamba ayo fwe bantu twingamona kwati te kuti tuyashipikishe.—Belengeni Amalumbo 18:29; Fil. 4:13.
Ibukisheni ukuti imyaka iingi nga nshi ilyo Esekiele talabako, kasesema Mose alandile ukuti Yehova alikwata amaka, kabili alafwaisha ukubomfya amaka yakwe pa kwafwa abantu bakwe. Mose alembele ukuti: “Lesa e cubo ukutula fye na kale, amaboko yakwe aya muyayaya yaba mwi samba lyobe.” (Amala. 33:27) Kuti twacetekela ukuti nga twatetekela Yehova Lesa wesu ilyo tuli na mafya, akabika amaboko yakwe mwi samba lyesu, kabili akalatwimya panono panono mpaka tukeminine na kabili.—Esek. 37:10.