Nailwike Ukuti Ubumi Bwalicindama Sana
CALI NI PA 16 APRIL, MU 2007, INSHITA YA LUCELO, kabili nasunsumene mu kona ye ofeshi lyabela pa ntunti yalenga butatu mu cikuulwa ca Norris Hall icaba pe sukulu likalamba ilya Virginia Polytechnic Institute and State University nelyo Virginia Tech ilya mu America. Pali ilya nshita nailwike na kabili ukuti ubumi bwalicindama nga nshi no kuti tufwile ukutasha cila bushiku pa bumi twakwata.
Nali mwi ofeshi lyandi, kabili nali pa kuya mukusenda amakalata pa ntunti ya bubili. Lyena kwaishile umukalamba wa ncito uwanjebele ukuti ndeya nankwe kwi ofeshi lyakwe pa kuti imulungishisheko kompyuta yakwe. Ilyo twali pa kwingila mwi ofeshi lyakwe, twaumfwile imfuti shatendeka ukulila palya pene pa ntunti yalenga bubili. Tatwaishibe ifyalecitika, e ico twabutukiile mwi ofeshi lyakwe, twaisalako ne ciibi, kabili twali no mwenso sana pantu tatwaishibe ifyali no kutucitikila. Naileikala mu kona kabili napepele kuli Yehova Lesa, ukumulomba ukuti angafwe muli fyonse ifyali no kucitika.
Ilyo twaikele mulya mu ofeshi, naibukishe icancitikile imyaka 15 ku numa. Nalebomba incito ya kulungisha imyotoka. Akakopo kanono umwali petro ako umunandi akwete katampile ukupya. Nomba pa mulandu wa kuti aletiina ukupya, apoosele akakopo kalepya pa menso yandi ukwabula no kwishiba! Nalipiile icine cine ukufuma ku mutwe ukufika mu musana, kabili nalipeemene icushi icingi. Bansendele ne ndeke ya pakapaka ku cipatala bondapilako abapya ku mulilo kabili pa myeshi itatu na hafu naikele umo basungila abalwalishe sana, umo naleculila. Imyeshi isano iyakonkelepo naleundapwa fye kabili nasukile napola, nabwelela na ku ng’anda ica kuti nalitemenwe sana pantu nalipuswike. Filya fyacitike fyalengele ukuti njiluke ukuti ubushiku bumo na bumo bwalicindama sana. Ifyacitike fyanengele ukutampa ukufwaisha ukuba Inte ya kwa Yehova Lesa uwampeele ubumi no kulamubombela.—Amalumbo 90:12; Esaya 43:10.
Pa mulandu ne fyo napiile, nalifililwe ukutwalilila ukulabomba incito ya kulungisha imyotoka, e ico nasambilile ukulungisha amakompyuta kabili nasangile incito pe sukulu lya Virginia Tech. E calengele ukuti nsangwe mu cikuulwa ca Norris Hall lulya lucelo.
Ilyo imfuti shatwalilile ukulila, ine no mukalamba wa ncito tatwaishibe ukuti abantu abali pe samba nababepaya icabipisha kabili imfwa yabo e yabipishe pa mfwa shonse isha bantu bakaele abafwa ku mfuti mu America. Imfuti shalekele ukulila lintu icipondo cailashile icine imfuti no kuipaya. Caipeye abantu ba kaele 32. Ilyo papitile amamineti 20 ukutula apo imfuti shatendekele ukulila, twaumfwile bakapokola balepita mu cikuulwa. Twalipundile kabili balitwafwile ukufumina pa nse.
Ifi ifyabipa ifyancitikile fyansambilishe ukuti umuntu kuti afwa inshita iili yonse kabili te kuti eshibe ne fingamucitikila ku ntanshi. (Yakobo 4:14) Ala mwandini calicindama ukucetekela Kabumba wesu Yehova Lesa uwatupeela ubumi, kabili tufwile ukulamona ubushiku bumo na bumo ubo twikala pa calo ukuti bupe bwacindama nga nshi ukufuma kuli ena!—Amalumbo 23:4; 91:2.
[Abatusuminishe Ukubomfya Icikope pe bula 30]
AP Photo/The Roanoke Times, Alan Kim