Abantu Batatu Abaliko Muli ba 1500 Abalefwaisha Ukwishiba Icine—Finshi Basangile?

“ICINE cinshi?” Ici e cipusho Ponti Pilato, kateka umwina Roma uwaleteka mu Yudea, aipwishe Yesu ilyo alemulubulwisha. (Yohane 18:38) Lelo, Pilato talefwaya ukwishiba icine. Na kuba, icipusho aipwishe calelanga ukuti aletwishika. Nalimo Pilato aletontonkanya ukuti icine fintu ifyo umuntu asuminamo nelyo ifyo bamusambilisha; takwaba uwingeba umunankwe ukuti ici e cine. Na muno nshiku abantu abengi e fyo batontonkanya.

Muli ba 1500 abena Bulaya abaleya ku mapepo tabaishibe bwino cine ico balingile ukusuminamo. Ukutula ku bwaice baishibe ukuti papa e wacindamisha no kuti ifisambilisho fya mu calici ifyo basuminemo e fyalungeme, lelo mu Bulaya monse mwaishileba ukwaluka mu fya mapepo. Ni cili kwi ico bali no kusumina? Bali no kwishiba shani ukuti ici e cine?

Pali iyi nshita, kwali abengi abalefwaisha ukwishiba icine kabili pali aba pali na baume batatu.a Bushe bacitile shani pa kuti beshibe ukuti ici e cine e lyo ubu bufi? Kabili finshi basangile? Natumone.

‘LEKENI BAIBOLO . . . ILETUTUNGULULA’

Wolfgang Capito ali mulumendo uwatemenwe sana ifya kwa Lesa. Apo alesambilila ifya budokota, buloya, ne fya mapepo, Capito aishileba shimapepo pa parish mu 1512 kabili pa numa aishileba shimapepo kuli shikofu mukalamba uwa ku Mainz.

Pa kubala, Capito alefwaya ukucincintila abaleshimikila ifyapuseneko ne fisambilisho fya mu Katolika. Lelo tapakokwele, Capito atampile ukutungilila abalefwaya ukwalula ifintu mu mipepele. Bushe acitile shani? Kalemba we lyashi lya kale James M. Kittelson atile ilyo kwaishileba ifisambilisho fyalekanalekana, Capito aleti “icingatwafwa fye ukwishiba ifyo baleshimikila nga fya cine ni Baibolo, pantu e yo twingacetekela fye.” E co, Capito atile ifyo icalici lyalesambilisha kuti pa Minsa umukate no mwangashi filasanguka umubili no mulopa wa kwa Yesu mu cisungusho e lyo no kupepa abatakatifu te fya mu Baibolo. (Moneni akabokoshi kaleti “Bashininkishe nga ca Kutila ifi Fintu fya Cine.”) Mu 1523, Capito alifumine pa cifulo cakwe icalumbuka ica kuba shimapepo kuli shikofu mukalamba no kuyaikala mu musumba wa Strasbourg, umwaleikala abalefwaya ukwalula ifintu mu mipepele.

Ing’anda ya kwa Capito mu Strasbourg e yo abalealula ifintu mu mipepele batampile ukukumaninapo pa kulanshanya pa fyakumine imipepele ne fyo Baibolo isambilisha. Nangu ca kuti abalealula ifintu balisumine muli Bulesa Butatu, ifyo Capito alembele mu citabo citila The Radical Reformation, filanga ukuti “talelanda pa cisambilisho ca Bulesa Butatu.” Mulandu nshi? Capito alitemenwe ifyo Michael Servetus, umwina Spain uwasambilile ifya mapepo, alebomfya amalembo ya mu Baibolo pa kulanga ukuti icisambilisho ca Bulesa Butatu ca bufi.b

Nga umuntu akaana ukuti Lesa tabamo batatu ifyalefumamo tafyalewama, e ico Capito talefwaya ukulanda ifyo aletontonkanya pa cintubwingi. Lelo ifyo alembele filanga ukuti aletwishika icisambilisho ca Bulesa Butatu na lintu ashilaishibana na Servetus. Shimapepo wa mu Katolika alembele ukuti Capito na banankwe “balelanshanya mu bumfisolo, balelanshanya na pa nkaama ya mu calici; kabili balikeene isambilisho lya Bulesa Butatu.” Pa numa ya myaka 100, Capito e o babalilepo ukulumbula pali bakalemba abalekaana sana ukuti Lesa tabamo butatu.

Capito asumine ukuti mu Baibolo e mwaba icine. Atile: “Lekeni Baibolo ne funde lya kwa Kristu filetutungulula mu fyo tulesambilila pali Lesa.” Dokota Kittelson alembele ukuti Capito “atile icalenga ukuti abasambilila ifya mapepo bafilwe ukwishiba icine ni co tababika amano ku Malembo.”

Umulumendo Martin Cellarius (uo baleita no kuti Martin Borrhaus) uwaleikala pa ng’anda ya kwa Capito mu 1526 na o alefwaisha ukusambilila icine icaba mu Cebo ca kwa Lesa.

“UKWISHIBA LESA WA CINE”

Cellarius afyelwe mu 1499, alesambilila ifya mapepo na mano ya bantunse kabili alisumine ukuba kafundisha mu Wittenberg, ku Germany. Apo mu Wittenberg e mwatendekele ukwaluka mu fya mapepo, Cellarius aishileishibana na Martin Luther e lyo na bambi abalefwaya ukwalula ifyo icalici lyalesambilisha. Bushe Cellarius ali no kulekanya shani icine ca mu Malembo na mano ya bantunse?

Icitabo citila Teaching the Reformation, catila Cellarius asumine ukuti pa kwishiba icine alingile “ukusambilila Amalembo, ukulalinganya Amalembo na Malembo yambi, e lyo no kulapepa amapepo no kulapila.” Finshi Cellarius asangile ilyo alebebeta Baibolo?

Mu 1527, mu July, Cellarius alembele ifyo asangile mu citabo citila On the Works of God. Alembele ukuti insakramenta sha mu calici, pamo nga umukate no mwangashi fimpashanya fye. Profesa Robin Barnes, alandile ukuti mu citabo Cellarius alembele, alilondolwele no “kusesema kwa mu malembo, ukuti kukaba inshita ilyo ifyabipa no kucula fikalacitika mu calo e lyo kukesaba inshita ilyo icalo cikawama nga nshi.”—2 Petro 3:10-13.

Ne cacindama sana mashiwi ayanono fye ayo Cellarius alandile pali Yesu Kristu. Nangu ca kuti tasuushishe icisambilisho ca Bulesa Butatu mu kulungatika, amashiwi alembele yalanga ukutila asumine ukuti “Shifwe wa ku Muulu” alipusanako no “Mwana wakwe Yesu Kristu” kabili alembele ukuti Yesu ali pali balesa abengi kabili abana aba kwa Lesa wa maka yonse.—Yohane 10:34, 35.

Robert Wallace alembele mu citabo cakwe icitila Antitrinitarian Biography (1850) ukuti mu fyo Cellarius alembele talelanda pa cisumino ca Bulesa Butatu ico basuminemo muli ba 1500.c Ici calenga abasoma abengi ukulatontonkanya ukuti afwile alekaana ukuti Lesa tabamo batatu. Bamulondolola ukuti aba pa bantu abo Lesa abomfeshe “ukusambilisha abantu ukwishiba Lesa wa cine na Kristu.”

ALESUBILA UKUTI BALATENDEKA UKUSAMBILISHA ICINE

Nalimo mu 1527, Johannes Campanus uwasambilile ifya mapepo kabili uwasoma uo bacindike sana, aile mu kwikala mu Wittenberg. Nangu ca kuti ali pa balefwaisha sana ukwalula ifintu mu mipepele, Campanus atendeke ukutwishika ifisambilisho fya kwa Martin Luther. Mulandu nshi?

Campanus alesuusha icisambilisho ca kuti pa Minsa, umukate no mwangashi filasanguka umubili no mulopa wa kwa Kristu. Kabili alesuusha ne cisambilisho ca kwa Luther ica kuti pa Mulalilo wa kwa Shikulu, Kristu alengele umubili wakwe ukusankana no mukate no mwangashi. André Séguenny alembele ukuti Campanus asumine ukuti, “Umukate tawalesanguka icili conse, wali fye insankramenta iyali cimpashanya ca mubili wa kwa Kristu.” Pa kukumana kwaliko mu Marburg mu 1529, apo balelanshanya pali aya malyashi, Campanus tabamusuminishe ukulandapo ifyo asambilile mu Malembo. Pa numa, abanankwe abo alebombela pamo nabo pa kwalula ifintu mu mipepele aba mu Wittenberg balimutalwike.

Ifyakalifye sana abo Campanus alebomba nabo fintu asumine pali Wishi, Umwana, na pa mupashi wa mushilo. Mu citabo citila Restitution, ico alembele mu 1532, Campanus alesambilisha ukuti Yesu na Wishi bantu babili abapusana. Alondolwele ukuti Wishi no Mwana “baba umo,” nga filya fine tutila umulume na umukashi “baba umubili umo,” ilyo ninshi bantu babili. (Yohane 10:30; Mateo 19:5) Campanus alandile ukuti mu Malembo babomfya icilangililo cimo cine pa kulanga ukuti Wishi alikwata amaka pa Mwana, yatila: “Umutwe wa mwanakashi mwaume; no mutwe wa kwa Kristu ni Lesa.”—1 Abena Korinti 11:3.

Finshi alandile pa mupashi wa mushilo? Na kabili, Campanus abomfeshe Baibolo pa kulondolola. Alembele ukuti: “Takwaba Ilembo nangu limo ililanda ukuti Umupashi wa Mushilo muntu uwalenga butatu . . . Amalembo nga yalanda pa mupashi wa kwa Lesa yalanga ukuti e o abomfya, e kutila apangile ifintu fyonse ukubomfya umupashi wakwe.”—Ukutendeka 1:2.

Luther atile Campanus wa miponto kabili mulwani wa Mwana wa kwa Lesa. Umbi uwalefwaya ifintu ukwaluka mu mipepele atile Campanus alingile ukufwa. Lelo, Campanus tabwelele inuma. Icitabo citila The Radical Reformation, calanda ukuti “Campanus alishininkishe ukuti ukukanaishiba ifyo Baibolo na batumwa basambilisha pali Lesa na pali bumutwe fyalenga ukuti mu Calici mube ifisambilisho fya bufi.”

Campanus talefwaya ukupanga icalici. Atile alyeseshe ukufwaya icine “mu tumabumba na mu bantu bonse abalefwaya ukwalula ifintu mu mipepele,” lelo tacisangile. E co alesubila ukuti icalici lya ba Katolika lyali no kutendeka ukusambilisha abantu amasambilisho ya cine aya Bena Kristu. Mu kuya kwa nshita, ba Katolika baikete Campanus, kabili afwile apoosele imyaka ukucila 20 mu cifungo. Abasambilila ilyashi lya kale batila afwile nalimo mu 1575.

“MULESHININKISHA IFINTU FYONSE”

Ukusambilila Baibolo e kwalengele Capito, Cellarius, Campanus, e lyo na bambi ukwishiba ubupusano bwali pa cine e lyo no bufi. Nangu ca kuti te fyonse ifyo basangile ifyumfwana ne cine caba mu Baibolo, aba baume balefwaya ukwishiba icine kabili balicindike sana icine ico basambilile.

Umutumwa Paulo akoseleshe Abena Kristu banankwe ati: “Muleshininkisha ifintu fyonse; ikatisheni icawama.” (1 Abena Tesalonika 5:21) Nga mulefwaya ukwishiba icine, Inte sha kwa Yehova balilemba icitabo icitila Bushe Cinshi Baibolo Isambilisha? Ici icitabo kuti camwafwa ukwishiba icine.