ICIPANDE ICIKALAMBA | BUSHE INTE SHA KWA YEHOVA NI BANI?
Finshi Inte sha kwa Yehova basumina?
Ba Nte basumina ukuti “Amalembo yonse aya mushilo yafuma kuli Lesa” kabili yalatwafwa. (2 Timote 3:16) Tulabomfya Baibolo pa kusambilila pali Kabumba na pa kwishiba ifyo tufwile ukuba ne nsansa.
Baibolo itila: “Pa kuti abantu beshibe ukuti imwe mweka, mwe bakwata ishina lya kuti Yehova, ni mwe Mwapulamo pano isonde ponse.” (Amalumbo 83:18) E ico, Yehova Lesa eo tupepa fye eka kabili apo tuli Nte shakwe, tulabila imbila nsuma ku bantu pa kuti beshibe ishina lyakwe.—Esaya 43:10-12.
Apo tuli Bena Kristu, twasumina ukuti Yesu “Mwana wa kwa Lesa”a kabili alishile pano calo no kuba Mesia. (Yohane 1:34, 41; 4:25, 26) Ilyo Yesu afwile, alibuukile no kuya ku muulu. (1 Abena Korinti 15:3, 4) Lyena aishileba Imfumu mu Bufumu bwa kwa Lesa. (Ukusokolola 11:15) Ubu Ubufumu, buteko bwa cine cine ubukalenga isonde ukuba Paradaise na kabili. (Daniele 2:44) Baibolo itila: “Abafuuka e bakekala mu calo, kabili bakasekelela nga nshi pantu umutende ukafula.”—Amalumbo 37:11, 29.
“Basumina ukuti nga balebelenga Baibolo ninshi Lesa alelanda nabo. Nga nabakwata amafya, balabomfya Baibolo pa kuti baishiba ifya kucita. . . . Bamona ukuti Icebo ca kwa Lesa ca mweo.”—Shimapepo wa ku Katolika, Benjamin Cherayath, inyunshipepala ya Münsterländische Volkszeitung iya ku Germany
Inte sha Yehova basumina ukuti abantu nga balekonka ifyo Baibolo ilanda, ifintu kuti filebawamina. (Esaya 48:17, 18) E ico tulakonka sana ifyo Baibolo ilanda. Ku ca kumwenako, apo Baibolo ilatusoka ukuti tatufwile ukucita ifintu ifingakowesha amatontonkanyo ne mibili yesu, tatupeepa fwaka nelyo ukubomfya imiti ikola. (2 Abena Korinti 7:1) Tatucita ne fyo Baibolo ilanda ukuti fyalibipa. Tatukolwa, tatucita ubulalelale, e lyo tatwiba.—1 Abena Korinti 6:9-11.
a Baibolo ilanda no kuti Yesu, “Mwana wa kwa Lesa uwafyalwa eka” pantu eo Yehova abalilepo ukubumba kabili eo Lesa fye umwine abumbile.—Yohane 3:18; Abena Kolose 1:13-15.