Bushe Ubufumu bwa kwa Lesa ni Cinshi?

IFYO BAIBO ILANDA

“Lesa wa mu muulu akemya ubufumu ubushakatale abonaulwa.”​—Daniele 2:44, Baibo Amalembo ya Calo Cipya.

“Natupeelwa umwana umwaume  . . . no buteko bwakwe bukalaba pee ubwa mutelelwe.”​—Esaya 9:6, 7, Bible wa Mushilo uwa mu 1983.

IFYO MUKANONKELAMO

• Mukalatekwa no buteko ubusuma ubukalenga mukekale bwino.​—Esaya 48:17, 18.

• Ilyo ubu buteko bukalateka icalo, abantu tabakalelwala kabili bakaba ne nsansa.​—Ukusokolola 21:3, 4.

BUSHE KUTI TWACETEKELA IFYO BAIBO ILANDA?

Ee pantu:

• Yesu alilangile ifyo Ubufumu bwa kwa Lesa bukacita. Yesu asambilishe abasambi bakwe ukulapepa ukuti Ubufumu bwa kwa Lesa bwise no kulapepela ukuti ukufwaya kwa kwa Lesa kucitwe pe sonde. (Mateo 6:9, 10) Yesu alilangile ifyo lilya ipepo likasukwa.

  Ilyo Yesu aali pe sonde, alilishishe abali ne nsala, aliposeshe abalwele, kabili alibuushishe abafwa! (Mateo 15:29-38; Yohane 11:38-44) Apo Yesu e ukaba Imfumu, ifyo acitile filangilila ifyo Ubufumu bwa kwa Lesa bukacitila abantu ilyo bukalateka.​—Ukusokolola 11:15.

• Ifilecitika mu calo filelanga ukuti Ubufumu bwa kwa Lesa buli no kutendeka ukuteka icalo conse nomba line. Yesu asobele ukuti ilyo Ubufumu bwa kwa Lesa bushilalenga mu calo mwaba umutende, mu calo mukaba inkondo, ifipowe e lyo ne finkukuma.​—Mateo 24:3, 7.

  Ifi fine e ficitika muno nshiku. Kanshi te kuti tutwishike ukuti nomba line Ubufumu bwa kwa Lesa buli no kupwisha amafya yonse ayaba mu calo.