Bushe Mutontonkanya Ukuti Ifintu Fikaba Shani ku Ntanshi?

IFYO BAIBO ILANDA

“Lesa . . . akakuumuna ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya kale nafipita.”—Ukusokolola 21:3, 4, Baibo Amalembo ya Calo Cipya.

IFYO MUKANONKELAMO

Mukalabomba imilimo iisuma iikalamuletela insansa.​—Esaya 65:21-23.

Tamwakalelwala nelyo ukucula.​—Esaya 25:8; 33:24.

Imwe no lupwa lwenu ne fibusa mukalaba ne nsansa umuyayaya.​—Amalumbo 37:11, 29.

BUSHE KUTI TWACETEKELA IFYO BAIBO ILANDA?

Ee, pantu:

• Lesa alikwata amaka ya kucita ifyo alaya. Ni Yehova Lesa fye e o Baibo iita ukuti “mwe ba Maka Yonse,” pantu alikwatisha amaka. (Ukusokolola 15:3) Kanshi akafikilisha ifyo atulaya ukuti akalenga ifintu fikawame pano isonde. Baibo ilanda ukuti, “Lesa ena kuti acita ifintu fyonse.”​—Mateo 19:26.

• Lesa alafwaisha ukufikilisha ifyo atulaya. Ku ca kumwenako, Yehova alafwaisha ukubuusha abafwa.​—Yobo 14:14, 15.

  Baibo ilanda no kuti Yesu, Umwana wa kwa Lesa, aleundapa abalwele. Mulandu nshi alebondapila? Ni co alefwaya ukubafwa. (Marko 1:40, 41) Yesu alipashenye sana Wishi pantu na o alefwaya ukwafwa abali na mafya.​—Yohane 14:9.

  Kanshi te kuti tutwishike ukuti Yehova na Yesu balafwaisha ukuti tukekale bwino ku ntanshi.—Amalumbo 72:12-14; 145:16; 2 Petro 3:9.