Bushe Ukucula Kukatala Akupwa?
Bushe kuti mwa-asuka ukuti . . .
ee?
awe?
nalimo?
IFYO BAIBO ILANDA
“Lesa . . . akafuuta ifilamba fyonse ku menso yabo, ne mfwa tayakabeko na kabili, takwakabe ukucula, ukuloosha, nangu ukukalipwa.”—Ukusokolola 21:3, 4, Baibo ya Contemporary English Version.
IFYO MUKANONKELAMO
Tuleshiba ukuti Lesa te ulenga tuleba na mafya.—Yakobo 1:13.
Tulasansamushiwa pantu tuleshiba ukuti Lesa alomfwa ububi nga amona tulecula.—Sekaria 2:8.
Tulakwata isubilo lya kuti ukucula konse kukapwa.—Amalumbo 37:9-11.
BUSHE KUTI TWACETEKELA IFYO BAIBO ILANDA?
Ee, pantu:
Lesa tomfwa bwino abantu nga balecula nelyo nga babafyenga. Belengeni ifyo Yehova Lesa aumfwile ilyo abantu bakwe balebacusha. Baibo itila Lesa alyumfwile ububi pa mulandu wa kuti “kwaleba abalebatitikisha no kubacusha.”—Abapingushi 2:18, Baibo Amalembo ya Calo Cipya.
Lesa tatemwa nga amona bamo balecusha abantu banabo. Ku ca kumwenako, Baibo itila Lesa alipata “iminwe iisumya umulopa wa kaele.”—Amapinda 6:16, 17.
Bonse fye Lesa alitubikako amano. Nga filya fine umuntu eshiba “icimucusha ne fyo akalipwa,” Yehova na o aleshiba ifyo cila muntu akalipwa.—2 Imilandu 6:29, 30.
Yehova nomba line akabomfya Ubufumu bwakwe pa kupwisha ukucula kwa muntu umo umo. (Mateo 6:9, 10). Pali ino nshita Yehova alasansamusha abantu abafwaya ukumwishiba.—Imilimo 17:27; 2 Abena Korinti 1:3, 4.
IFYO MULINGILE UKULATONTONKANYAPO
Mulandu nshi Lesa asuminishisha ukucula?
Baibo ilasuka ici cipusho pa ABENA ROMA 5:12 na pali 2 PETRO 3:9.