Bushe abafwa kuti baba aba mweo na kabili?

IFYO BAIBO ILANDA

‘Abafwa bakabuushiwa.’​—Imilimo 24:15, Baibo Amalembo ya Calo Cipya.

IFYO MUKANONKELAMO

Baibo kuti yamusansamusha nga ca kuti lupwa nelyo cibusa afwa.—2 Abena Korinti 1:3, 4.

Baibo kuti yalenga mwaleka ukutiina ukufwa.​—AbaHebere 2:15.

Baibo kuti yalenga mwakwata isubilo lya kwisaba pamo na balupwa ne fibusa abafwa.​—Yohane 5:28, 29.

BUSHE KUTI TWACETEKELA IFYO BAIBO ILANDA?

Ee, kuti twacetekela pantu:

• Lesa e wabumbile ifya mweo. Baibo ita Yehova Lesa ukuti “intulo ya mweo.” (Amalumbo 36:9; Imilimo 17:24, 25) Apo Lesa e wabumbile ifya mweo fyonse, te kuti afilwe ukulenga umuntu uwafwile aba no mweo na kabili.

• Kale Lesa alibuushishe abantu abafwile. Baibo yalilanda pa bantu 8 ababuushiwe. Pali aba pali abaice, abakalamba, abaume e lyo na banakashi. Bamo babuushiwe ninshi tapalakokola ukutula apo bafwilile, lelo umo abuushiwe ninshi palipita ne nshiku 4!—Yohane 11:39-44.

• Lesa alafwaisha ukubuusha abafwa na kabili. Yehova alipata imfwa ica kuti aimona ukuti mulwani. (1 Abena Korinti 15:26) Alafwaisha ukucimfya ulya mulwani, e kuti ukufumyapo imfwa ilyo akabuusha abafwa. Alafuluka ukubuusha bonse abo ebukisha kabili alafwaisha ukuti bakekale pe sonde na kabili.—Yobo 14:14, 15.