Kateka wa Calo Conse Nani?

IFYO BAIBO ILANDA

“Icalo conse caba mu maka ya mubifi.”​—1 Yohane 5:19.

“Umwana wa kwa Lesa aishile ku konaula imilimo ya kwa Satana Kaseebanya.”​—1 Yohane 3:8, Baibo ya New Century Version.

IFYO MUKANONKELAMO

Kuti twaishiba icalenga amafya yafule muno calo.​—Ukusokolola 12:12.

Kuti twacetekela ukuti ifintu tafyakatwalilile ukuba ifyo fyaba, lelo fikawama.​—1 Yohane 2:17.

BUSHE KUTI TWACETEKELA IFYO BAIBO ILANDA?

Ee, pantu:

• Satana takatwalilile ukuteka. Yehova takaleke Satana akatwalilile ukuteka abantu. Alilaya ukuti ‘akonaula . . . Satana Kaseebanya’ kabili akafumyapo ifyabipa fyonse ifyo Satana aleeta.​—AbaHebere 2:14, Baibo Amalembo ya Calo Cipya.

• Lesa alisala Yesu Kristu ukuteka icalo conse. Yesu alipusanako sana kuli kateka wa cino calo umunkalwe kabili uwaitemwa. Lesa alitweba ifyo Yesu akalateka icalo, atile: “Akomfwila uluse uo bacusha no mupiina . . . Akabapususha ku bankalwe na kubacusha abantu.”​—Amalumbo 72:13, 14.

• Lesa tabepa. Baibo itila: ‘Lesa te kuti abepe.’ (AbaHebere 6:18) Yehova nga alaya ukucita icintu, ciba fye kwati no kufikilisha nafikilisha kale. (Esaya 55:10, 11) “Kateka wa pano calo bakamutamfyamo.”​—Yohane 12:31.