“Mulecita Ici” Ukwibukisha Imfwa ya kwa Yesu pa 5 April
1. Mulandu nshi Icibukisho cacindamina?
1 Yesu apeele abasambi bakwe ifunde ilya kulaibukisha imfwa yakwe ilyo abebele ukuti: “Mulecita ici ku kunjibukisha.” (Luka 22:19) Ubushiku bwa kwibukisha imfwa ya kwa Yesu e bushiku ubwacindamisha ku Bena Kristu pantu icilubula apeele calenga tuleipakisha amapaalo ayengi nga nshi. Icibukisho uno mwaka cikabako pa 5 April, kabili ubu bushiku buleya bulepalama. Nomba bushe kuti twalanga shani ukuti tulatasha nga nshi kuli Yehova?—Kol. 3:15.
2. Bushe kuti twalanga shani ukuti tulatasha Yehova pa Cibukisho ukupitila mu kubelenga no kwetetula?
2 Ipekanyeni: Nga kwaba ifintu ifyo tumona ukuti fyalicindama, tulaipekanya bwino bwino. Kuti twapekanya imitima yesu ukwibukisha imfwa ya kwa Yesu nga twasambilila no kutontonkanya sana pa fyalecitika mu nshiku sha kulekeleshako ilyo Yesu ali pano calo. (Esra 7:10) Amalembo yamo ayalanda pa fyalecitika muli ishi nshiku yaba pali kalenda na mu katabo ka Ukubebeta Amalembo Cila Bushiku, lelo amalembo yonse kumo ne fipandwa fya mu citabo ca Umuntu Wakulisha Uwabalile Abako Uwa Mweo ifilanda pali ili lyashi fisangwa pa mabula 23-24 mu Ulupungu lwa kwa Kalinda ulwa February 1, 2011.
3. Kuti twalanga shani ukuti tulatasha Yehova pa Cibukisho ukupitila mu kushimikila?
3 Muleshimikila: Na kabili kuti twalanga ukuti tulatasha nga tulebombesha mu mulimo wa kushimikila. (Luka 6:45) Ukutendeka pa Saturday, pa 17 March, mu calo conse fye, tukakwata kampeni iya kwita abantu ku Cibukisho. Bushe te kuti mwaluleko fimo ifyo mucita pa kuti mukakwate inshita ya kushimikila sana, nalimo ukubombako bupainiya bwa kwafwilisha? Bushe te kuti mulande pali ili lyashi pa bushiku mukakwata Amapepo aya Lupwa?
4. Kuti twanonkelamo shani nga twasangwa ku Cibukisho?
4 Ala tulanonkelamo icine cine ilyo tusangwa ku Cibukisho cila mwaka! Tulasekelela nga nshi kabili tulatemenwako Yehova nga twatontonkanya pali bukapekape bwakwe ubwa kutuma Umwana wakwe uwafyalwa eka ukuti ese atufwile no kutulubula. (Yoh. 3:16; 1 Yoh. 4:9, 10) Ici cilenga ukuti twilaikalila fwe bena. (2 Kor. 5:14, 15) Kabili cilalenga no kuti tulefwaisha ukulumbanya Yehova pa cintubwingi. (Amalu. 102:19-21) Ukwabula no kutwishika, ababomfi ba kwa Yehova abatasha nga nshi pa cilubula balafwaisha ukwisaipakisha ishuko tukakwata pa bushiku bwa Cibukisho pa 5 April ilya ‘kubila imfwa ya kwa Shikulu.’—1 Kor. 11:26.