Kalata Ukufumu kwi Bumba Litungulula

Ku Babwananyina:

Ala natutemwa nga nshi pa kumulembela ino kalata pa kutampa kwa uno mwaka uwacindama sana! Ilyo tukafika ku mpela ya uno mwaka uwa 2014, ninshi papita imyaka 100 ukutula apo Yesu Kristu, Imfumu yesu atampila ukuteka mu kati ka balwani bakwe.—Amalu. 110:1, 2.

Ku kutampa kwa uno mwaka wa mulimo, pa kukumana kwa pa mwaka ukwa Watch Tower Bible and Tract Society of Pennsylvania, bamunyinefwe ababa muli New World Bible Translation Committee batile, Baibolo ya Amalembo ya Calo Cipya iyapitulukwamo iya mu Cingeleshi naifuma. Yehova abomfeshe abana bakwe abafyalwa ku mupashi ukupilibula Baibolo ya Amalembo ya Calo Cipya iya kubalilapo. (Rom. 8:15, 16) Ici icishinka e cilelanga ukuti iyi Baibolo yaliibela, bushe tamulesumina?

Pa myaka iingi, ba Writing Committee (Komiti ya Kulemba) abe Bumba Litungulula balipingulapo ukuti umulimo wa kupilibula Baibolo e ulingile ukuba pa ntanshi. Fino tulelanda, Baibolo ya Amalembo ya Calo Cipya yalipilibulwa mu ndimi 121 yonse nelyo amabuuku yamo yamo fye. Tulemukoselesha ukulanga Yehova ukuti mulatasha no mweo onse pa kukwata iyi Baibolo. Muleibelenga cila bushiku no kulatontonkanya pa fyo mulebelenga. Ici cikalenga mukapalame sana kuli Yehova Lesa umwine wa iyi Baibolo.—Yako. 4:8.

Tulekatwa sana ubulanda ilyo tuleumfwa ifyo bamunyinefwe baleeshiwa. Kwena, limo limo bamunyinefwe kuti cabafya ukusansamukila pamo na babwananyina. Ica kumwenako fye, ulupwa lumo ku Asia nomba line fye lwalikwete ubwafya ubukalamba nga nshi ilyo umufyashi umwanakashi alwele ubulebe. Calibapapwishe, pantu badokota balifililwe ukumundapa. Ala ca bulanda nga nshi! Abena mwabo nomba e bababombela fyonse cila bushiku. Umwana wabo umwaume na banakashi babili balakonka ifyo Baibolo ilanda pantu balabomba bwino sana ku kwafwilisha abafyashi babo. Ulu ulupwa ulwaikatana ukubikako na imwe bonse mwe bacimfya amesho ayalekanalekana, kuti mwaba ne nsansa nga mwashipikisha amesho ya citetekelo cenu. (Yako. 1:2-4) Yehova alilaya abasubwa bakwe na ba mu mpanga shimbi ukuti bakasekelela nga batwalilila ukushikipisha amesho pantu bakapaalwa ilyo akabapeela umweo wa muyayaya.—Yako. 1:12.

Uyu mwaka wapwile, abasangilwe ku Cibukisho baali 19,241,252. Ala tulakoseleshiwa nga nshi ukumona abantu abengi balecindika Yehova na Yesu Kristu pa kusangwa ku kulongana ukwacindamisha mu mwaka ukwa bantu ba kwa Lesa! Mu myeshi ya Cibukisho, Lesa alilumbanishiwe nga nshi ilyo bakasabankanya abengi babombele bupainiya bwa kwafwilisha mu March na mu April. Cali cakukoselesha nga nshi! Na kabili, bushe tamwatemenwe pa kwishiba ukuti abalebomba bupainiya bwa kwafwilisha ilyo kangalila wa muputule alebombela icilonganino cabo, kuti basangwako ku kukumana kwa bapainiya konse, nangu fye ni lintu ukubombela ifilonganino takuli mu March na mu April? Abashilimuka lwa ku mupashi balishiba ubucindami bwaba mu kuba abakosa mu kushimikila na mu kubomba imilimo ya cilonganino. Ukubombesha kulatwafwa ukuba abashangila kabili abashitelententa, kulalenga Satana Kaseebanya afilwe ukunenuna icitetekelo cesu no kutulufya.—1 Kor. 15:58.

Ala kwena, cakukoselesha nga nshi ukumona ukuti umwaka wa mulimo uwapwile abantu 277,344 balibatishiwe, ukulangilila ukuipeela kwabo, kabili nomba baleenda mu nshila ya ku bumi pamo na bamunyinabo icalo conse! (Mat. 7:13, 14) Tulingile ukulayafwa aba bantu pa kuti bengaba “ne citetekelo icakosa” (Kol. 2:7) Twalilileni ukulakoseleshanya mpaka na ku mpela. (Mat. 24:13) “Sansamusheni abali no bulanda, koselesheni abanaka, beni abashishimisha kuli bonse.” (1 Tes. 5:14) Ica kulekelesha, shi ifwe bonse ‘natulepepa ukwabula ukuleka’ ukuti: “Ubufumu bwenu bwise”—1 Tes. 5:17; Mat. 6:10.

Shi na muipakishe ukubelenga cino citabo ca Ilyashi lya Nte sha kwa Yehova. Mulingile ukwishiba no kuti twalimutemwa bonse mwe batemwa Yehova!

Ni fwe bamunyinenwe,

Ibumba Litungulula ilya Nte sha kwa Yehova