Kakaku kuker Ras Ḇarpon Iyama
Fafisu ono ido, wakfuken rosai na ḇeḇejadi ro ras ḇarpon iyama ke? Refo ikofenḇair roi na ḇeḇejadi ma roi anna nari nawyae snonkaku syakam ro supswan ine.
Yesus ikofenḇair moḇsa bisa kofawi Allah Karajan Ḇyedi fyanam kwar. (Lukas 21:31) Ikofen kwar snar roi nari ḇeḇejadi iso mamamun, tatawai, kananjar roḇean na, ma dafduf ḇefarpampam. Ine iso roi komam ro baboine.—Lukas 21:10-17.
Refo ikofenḇair kako roi oso na ḇeḇejadi ro snonkaku sya pamarenta sena ro fafisu rasras ḇepupes, isoine snonkaku sya sifrur roi ḇeḇarḇor. Wawasya roi nane ro 2 Timotius 3:1-5. Fafisu mam kenem ma rosai snonkaku sya sifrur ro baboine na, wakyar roi Refo ikofen kwar nane nkaku ma namnis kuker rosai ḇeḇejadi ro fafisu ine.
Roi nane kyurfasnai ḇe? Fafisu ani fyanam kwar faro Allah Karajan Ḇyedi fa fyadwer kaku kankenem ro supswan ine fa ipyum syadi. (Lukas 21:36) Ro Refo, Allah ikofen kwar roi ḇepyum faro supswan ma snonkaku ḇekenem ro dori sya. Mam roi ḇeḇeso nane.
PAMARENTA ḆEPYUM SYADI
”Ḇyuk ḇe [Yesus i] papoik, syowi, ma karajan, insama snonkaku ḇerama ro er ma wos ḇebor sifarmyan ḇe i. Ḇaḇepapoik ḇyedi iso ḇaḇepapoik ḇekain fyoro, ḇepok ḇemnai ḇa, ma karajan ḇyedi na ipromes ḇaḇeri.”—DANIEL 7:14.
Ine kyurfasnai: Bisa wakenem ro Allah pamarenta ḇepyum Ḇyedi kuker Yesus iso ḇe Raja ya.
DAFDUF NOḆA
”Snonkaku oso ḇaḇeri ḇeḇarek ro diwa nari ikofen, ’Yadufe.’”—YESAYA 33:24.
Ine kyurfasnai: Wapok waduf ḇa ḇaido baken Bena namnis kam, wakenem fyoro, ma wamar wer ḇa.
PAYAMYUM ISYA PDEF
”Na ifrur mamamun ro supswan ine fa namnai.”—MAZMUR 46:9.
Ine kyurfasnai: Nari mamun noḇa ma roi ḇefrur kandera snar mamun ya naisya ḇa kwar.
SUPSWAN INE NARI IFO KUKER SNONKAKU ḆEFRUR PYUM
”Snonkaku ḇeḇarḇor nari sisya ḇa kwar . . . Snonkaku ḇena sne ḇemayar sya siso nari ḇena supswan.”—MAZMUR 37:10, 11.
Ine kyurfasnai: Snonkaku ḇeḇarḇor na sisya wer ḇa, mboi snonkaku ḇesouser faro Allah monda siso na ḇeḇarek ro supswan ine.
SUPSWAN INE ḆESIPER NARI ḆYE FIRDAUS
”Sḇawes rum ma sḇarek ro na; na sifrur yaf anggur ma san bon na.”—YESAYA 65:21, 22.
Ine kyurfasnai: Supswan ḇesiper ine nari ipyum syadi. Allah nari kyarem nadi koḇena imnis marisen Ḇyedi fa ndarirya ro ”supswan ine”.—Matius 6:10.