Moḇsa Saksi-Saksi Yahwe Sya Farkarkor Refo Sena Isnai Rai?

Saksi-Saksi Yahwe na sikofenḇair nyan ḇepyum fa wasmai payamyum ro Wos Refo ya. Farkarkor Refo nggoḇenane nari nasaramper Au fa:

• Wasmai marasrisen ro kenem Bena

• Nwa wis ḇepyum kuker Manseren Allah

• Wafawi rosai Refo ikofen ḇekur ras ḇarpon iwama

Ro dine nari dawos:

• Farkarkor Refo ine moḇsa isnai rai?

• Yafarkor ido na yaḇak fis?

• Farkarkor ine imbran kawan ke?

• Rosai na yafrur insama bisa yakfarkor?

• Yakfarkor ḇe oser fa yamam resari bisa ke?

• Yakfarkor Refo ine ido, nari sidif aya fa yaksun ro Saksi-Saksi Yahwe sya ke?

• Bisa yaḇepake Refo ayena ro farkarkor ine ke?

• Bisa yor snonggaku ḇese fa sakso aya ro farkarkor ine ke?

• Fyor iwara yafarkor Refo kuker Saksi Yahwe sya kwar ido, bisa yor fa yafarkor kaḇer wer ke?

• Yafarkor Refo kuker Saksi Yahwe sya ḇa boi yafarkor ro manggundaya bisa ke?

Farkarkor Refo ine moḇsa isnai rai?

Saksi Yahwe oso nari isaramper Au fa wakfarkor Refo kuker syap Wasmai Payamyum Ḇekain Fyoro! Ro syap anya, nari wafawi rosai Refo ikofen na ma wafawi payamyum rosai nari wasmai ya. Imbe wafawi syadi roi ine ido, mampan vidio ine.

Yafarkor ido na yaḇak fis?

Ḇak na ḇa. Fafisu Manseren Yesus ikenem ro supswan ine, ikofen ḇe manfamyan ḇyesi radine, ’Mkosmai waworek na monda kwar, inja mkakbuk waworek kako’. (Matius 10:8) Ine iso eḇedari Saksi-Saksi Yahwe sya sbuk farkarkor ido, na sor ḇaḇyak oḇa. Inja, syap sbuk ḇe Au na kako sor fa ḇak na ḇa. Rupa ra, Refo ma syap Wasmai Payamyum Ḇekain Fyoro!

Farkarkor ine imbran kawan ke?

Syap Wasmai Payamyum Ḇekain Fyoro! ine iser farkarkor ri 60. Manggundaw kwinfir imbe wasmai farkarkor nabor ke roḇa fafisu wafarkor ya. Ḇebor sya skinfir fa sfarkor farkarkor oser ḇaido nasyadi ro swaf minggu oser.

Rosai na yafrur insama bisa yakfarkor?

1. 1. Waser formulir ro Internet na. Roi waser nakam sbuk famfnom na ḇa mboi sifrur na raris moḇ wamarisen raya, isoine insama Saksi Yahwe oso bisa isrow Au.

2. 2. Saksi Yahwe oso nari isrow Au fa dawos yoḇ Au. Nari ikofenḇair ḇe Au fa wafawi moḇsa farkarkor Refo ine isnai rai. Nari kyarem fakfuken Bena kako.

3. 3. Muyawos snai moḇsa na mufarkor rai ma muyap ras risai imbe mufarkor ya. Imbe wor fa Saksi-Saksi Yahwe srama sisrow Au ido, manggundaw. Oroḇa ido, kwinfir fa wafarkor monda ro telfon, vidio, surat, ḇaido email na. Sia sfarkor ido, kawanwan ya oras oser. Imboi imbe farkor fasaw syadi ke kawan syadi ke ryamuma ro Au.

Yakfarkor ḇe oser fa yamam resari bisa ke?

Imbo. Imbe farkor ḇe oser fa mam resari ido, waser formulir ro Internet na. Saksi Yahwe oso dawos yoḇ Au ido, wakofenḇair ḇe i bo woḇe imbe wakfarkor Refo fa mam resari. Nari byuk syap Wasmai Payamyum Ḇekain Fyoro! ḇeser farkarkor ri kyor oso ḇe Au. Farkor syap ḇeknampu ine kwar ido, manggundaw kwinfir imbe farkor pdef ke roḇa.

Yakfarkor Refo ine ido, nari sidif aya fa yaksun ro Saksi-Saksi Yahwe sya ke?

Oroḇa. Saksi-Saksi Yahwe sya simarisen sbuk farkarkor Refo faro kawasa sya. Imboi, nggoma nggopok nggodif manseirya ḇa kako fa siso inggo. Nggoḇesyowi snonggaku oser-oser fa kyinfir kakyar ḇyena ro manggundi.​—1 Petrus 3:15.

Bisa yaḇepake Refo ayena ro farkarkor ine ke?

Imbo, bepake Refo rosai monda wamarisen ya. Ḇebor sya simarisen sepake Refo sismai kwar ro rum sena. Manggun inggo nggomarisen nggoḇepake Kitab Suci Terjemahan Dunia Baru, kukro wos ḇyena nasnai ma nasrow kaku.

Bisa yor snonggaku ḇese fa sakso aya ro farkarkor ine ke?

Imbo, bisa wor bati ma kina karyer Bansya kam fa sakso.

Fyor iwara yafarkor Refo kuker Saksi Yahwe sya kwar ido, bisa yor fa yafarkor kaḇer wer ke?

Imbo. Nggokyar na wamarisen syadi faro farkarkor sifrur babo ine, kukro nyan sfasos farkarkor ine nasrow kuker snonggaku sya kenem sena ro fafisu ine. Nyan sifrur farkarkor Refo ine kako ipyum syadi kukro sonin ma vidio nabor naisya.

Yafarkor Refo kuker Saksi Yahwe sya ḇa boi yafarkor ro manggundaya bisa ke?

Imbo. Snonggaku ḇebor sya sismai payamyum nabor syadi kukro sfarkor kuker Saksi Yahwe sya ḇeri. Fama ro randak kaku, sia skinfir fa sfarkor Refo ya ro manggunsi. Mam ro Fafnoḇek fa Kokfarkor Refo kada, roi nabor naisya sfasos na fa bukifarkor Refo ro manggundaw. Bas kam na fa mam monda kukro naser ḇaḇyak oḇa. Roi ḇeḇeso sfasos na iso:

• Vidio Ḇeknam ro Refo. Vidio-vidio ḇeknampu nane nfasnaiḇair farkarkor ḇeknam kaku ro Refo ya.

• Fakfuken Ḇekur Refo Neḇekarem. Ro bar ine, awawos nabor naisya nakarem fakfuken ḇebor sifuken ḇekur Refo ya.

• Sfasnaiḇair Mnuk ro Refo. Ro bar ine, awawos naisya nfasnai pyum fa kofawi snai mnuk ro Refo ma apap korower ker ro Refo ya.