Moḇsa Sisaramper Saksi-Saksi Yahwe Sya Fararur Sena Rai?

Saksi-Saksi Yahwe nggoya nggoiso ḇepon kaku ḇesaramper fararur ḇaḇebaryas nggofrur ro supswan ḇesiper kuker nggobuk farsarser kumpan.a Ro moḇ nggoḇeari ro na srir kotak sumbangan na. Nyan ḇese nggobuk farsarser kumpan iso roro internet imnis mam ro bar Farsarser. Ono simarisen sbuk farsarser kumpan ido na skinfir ro manggunsi imbe sbuk faro fararur ro supswan ḇesiper ke faro fandandun sidang ke ḇaido sukame.

Sor Saksi-Saksi Yahwe nggoine fa nggobuk perpuluhan ḇa ḇaido sap namuk ḇepon kumpan imbe nggobuk na ḇa. (2 Korintus 9:7) Nggoma nggor derma ḇa ḇaido nggor fa sbak ro fananjur ari nggobena ḇa. Ḇeyuffarmyan ro sidang nggoḇedi kako sor ḇaḇyak oḇa faro munara baptis, karamram, munara fakawin, ma fararmyan rohani ḇesena. Nggoryur kumpan ḇa kuker nggoboḇ kukis, nggofrur bazar, karnaval, anan kayam, ma ḇesena. Nggofararyor farsarser kumpan ro snonggaku sya ḇa. Ḇebuk farsarser kumpan sya na nggokofenḇadir snonsnon sena ḇaido kumpan sbuk na ḇa. (Matius 6:2-4) Srir iklan ro situs web ma syap-syap nggoḇena ḇa kako insama nggosmai kumpan na.

Ro paik ḇe paik, sidang jemaat ro Saksi-Saksi Yahwe syakam na sikofenbadir kumpan sena ro fananjur ari sena, ḇerama sya Saksi sya monda ḇa. Sidang na sfasepen iser-iser kumpan sisasyar kwar na, insama sifawikam moḇsa sbuk pyum kumpan na rai.​—2 Korintus 8:20, 21.

Nyan fa Buk Farsarser Kumpan

• Kotak sumbangan: Na waser pipi ḇaido cek ḇe kotak sumbangan srir ro Balai Kerajaan, Balai Kebaktian, ḇaido fananjur ari nggoḇena.

• Farsarser roro internet: Ro sup ḇebor, na buk farsarser kuker kartu kredit, kartu debit, faramrem ḇeḇe elektronik, ma nyan ḇese roro internet ro bar ”Buk Farsarser Kumpan faro Saksi-Saksi Yahwe Sya”.b Saksi Yahwe ono sisya sbuk nyan ḇeradine fa sfasos ḇepon farsarser kumpan imbe sbuk ker na ro paik ḇe paik.​—1 Korintus 16:2.

  

• Farsarser kumpan fasos ḇepon na: Farsarser ono fandun fa fasos pyum ḇepon na ma/ḇaido wawos ḇepon na kuker penasihat hukum. Fasos pyum ido, nari wasmai fainda ro sistem pajak ḇero sup ḇarek ro ya. Ḇebor sya smam fainda ḇyena kwar snar sisewar fa sifawi epon pemberian amal kako bisa sbuk na ḇe farsarser ro fafisu sikenem kaker ḇaido rofyor simar kwar. Imbe wafawi nabor syadi ido, bisa wawos ḇe kantor cabang Saksi-Saksi Yahwe ḇero moḇ Bedi rofyor wamarisen fa buk farsarser kumpan roro:

  • rekening bank

  • asuransi ma pipi pansyon

  • rum ḇaido aidoram

  • saham ma obligasi

  • wasiat ma perwalian

Imbe wafawi nyan fa buk farsarser kumpan ḇesya ro moḇ Bedi ido, mam ro bar ”Buk Farsarser Kumpan faro Saksi-Saksi Yahwe Sya.”